Araşdırmalar göstərir ki, həddindən artıq istilik, rütubət və digər iqlimlə əlaqəli hadisələr depressiya və narahatlıq kimi psixi sağlamlıq pozğunluqlarını artırır. 

Fevral ayında “Lancet Planetary Health”də dərc olunan araşdırma, dünyanın iqlimə ən həssas ölkələrindən biri olan Banqladeşdə iqlimlə əlaqəli və sosiodemoqrafik əlaqələri araşdıran məlumatları təqdim edib: “İqlimin psixi sağlamlığa necə təsir göstərə biləcəyi ilə bağlı tədqiqat digər xalqlar üçün xəbərdarlıq olmalıdır”. 

Bildirilib ki, iqlim dəyişikliyi pisləşdikcə, temperatur və rütubət artmağa davam edəcək, həmçinin ekstremal daşqın kimi təbii fəlakətlər psixi sağlamlığa pis təsir göstərəcək. 

Aztibb.az news-medical.net-ə istinadən xəbər verir ki, tədqiqatçılar bütün yuxarı yaş qrupları arasında depressiya və narahatlığa qarşı həssaslığın artdığını müəyyən ediblər. Xüsusilə qadınlarda depressiyaya daha çox həssaslıq müşahidə olunub. 

“İqlimin pozulmasının fiziki təsirləri daha çox diqqəti cəlb edir. Psixoloji yüklər çox vaxt gizli qalır, şüursuz şəkildə insanların həyatının hər bir sahəsinə sızır və tədricən psixi gərginlik artır. Məlumatlılığın az olması səbəbindən onları müalicə etmək olduqca çətindir”, ­– deyə İqlim Psixiatriya Alyansının həmtəsisçisi Liz Van Sasteren bildirib. 

Qeyd edib ki, belə tədqiqatlar iqlim böhranının çətinliklərini yaşayan insanların sağlamlığı və gələcəyi üçün yüksək qiymətləndirilməlidir. Çünki ətraf aləmdə fırtınalar nə qədər pis olsa da, içimizdə yaranacaq fırtınalardan daha pis ola bilməz.