Ümumdünya Səhiyyə Təşkilatı (ÜST) dünyada vəba xəstəliyinin yayılma riskini "çox yüksək" kimi qiymətləndirib. 

Aztibb.az TASS-a istinadla xəbər verir ki, təşkilat xüsusilə vəba ilə bağlı yüksək ölüm halından narahatdır.

Fevralın 1-nə olan məlumata görə, dünyanın 18 ölkəsindən yeni xəstəliyə yoluxma halları qeydə alınmağa davam edib. Proqnozlara görə, ÜST-ün şənbə günü Cenevrədə dərc olunmuş məlumat vərəqinə əsasən, növbəti aylarda belə ölkələrin sayı arta bilər.

ÜST xatırladıb ki, son iki əsrdə dünyada yeddi vəba pandemiyası qeydə alınıb. Hələ də davam edən yeddinci pandemiyanın 1961-ci ildə başladığı güman edilir. 1990-cı illərin sonlarında qlobal insident əhəmiyyətli dərəcədə azalsa da, Asiya və Afrikanın bəzi bölgələrində vəba geniş yayılmışdır.