Azərbaycan Tibb Universitetinin (ATU) Tədris Terapevtik Klinikasının müalicə işləri üzrə direktor müavini Fəridə Hacıyeva, klinikanın həkimləri və rezidentlərinin iştirakı ilə "Limfomalar" mövzusunda seminar keçirilib.

Klinikadan Aztibb.az-a verilən xəbərə görə, tədbirdə Hematologiya şöbəsinin rezidenti Nazəni Xeyrəddinli mövzu üzrə təqdimatla çıxış edib.

Həkim limfomaların limfa düyünlərində və digər limfoid toxumalarda toplanan bədxassəli limfositlər tərəfindən törədilən və xarakterik klinik əlaməti limfadenopatiya və B simptomları olan xəstəlik olduğunu bildirib. Qeyd edib ki, limfomalar leykemiyalar ilə birlikdə qanın bədxassəli şişlərinin 2 böyük qrupundan biridir.

Xəstəliyin növlərindən danışan məruzəçi, limfomaların özünün də Hodgkin və qeyri- Hodgkin limfoması olmaqla 2 yerə ayrıldığını diqqətə çatdırıb.

N.Xeyrəddinli xəstəliyin etiologiyası haqqında da ətraflı məlumat verib. Onun sözlərinə görə limfomaların etiologiyası tam məlum deyil: "Lakin immun sisteminin zəifliyi, immunosupressorların qəbulu, autoimmun xəstəliklərin olması, HİV, EBV ilə yoluxma kimi risk faktorları xəstəliyin yaranmasında rol oynayır. Limfomaların klinikasında əsas nəzərə çarpan limpoadenopatiya və B simptomlarının varlığıdır. Limfoadenopatiya əsasən boyun, qoltuqaltı, qasıq nahiyəsində ağrısız, şişmiş limfa düyünləri şəklində müşahidə olunur. B simptomlarına isə səbəbsiz arıqlama (bədən çəkisinin 10%-dən artığı), səbəbi açıqlana bilməyən qızdırma və gecə tərləmələri daxildir".

Limfomaların diaqnostikası haqqında məlumat verən həkim, burada ən dəqiq və vacib üsulun limfa düyününün ekzisional biopsiyası olduğunu bildirib. Qeyd edib ki, bundan əlavə anamnez, fizikal, instrumental və laborator müayinələrdən də geniş istifadə olunur.

Seminarın sonunda N.Xeyrəddinli tərəfindən iştirakçıların sualları cavablandırılıb, mövzu ətrafında geniş müzakirələr aparılıb.