Mərkəzi Gömrük Hospitalının Təcili yardım şöbəsinin müdiri, təcili yardım həkimi Nərgiz Kərimova “Həkim məsləhəti” rubrikasında “Hava dəyişkənliyinin meteohəssas insanlara insanlara təsiri” mövzusunda məlumat verib.
Həkim bildirib ki, hava dəyişkənliyi ilə sağlamlığı arasında müəyyən uyğunluq olan insanlar var. Onları meteohəssas insanlar adlandırırlar. Onların havaya fərqli reaksiya göstərməsinə səbəb havada təsiredici amillərin olmasıdır. Bu da əsasən atmosfer təzyiqinin dəyişkənliyi, temperaturun kəskin yüksəlməsi, yaxud enməsi zamanı müşahidə olunur. Məsələn, yağıntı artıq olanda ürək və revmatik problemi olanlar narahat olur, şimal küləkləri əsəndə havada oksigenin artması ilə rahat tənəffüs almaq olur.
Onun sözlərinə görə, şimal küləyinin cənub və cənub-qərb küləyi ilə əvəz olunması narahatlığa səbəb olur, çünki şimal küləyində oksigen daha yüksək, cənub küləyində isə oksigenin miqdarı az və çirkli hava olur. Xroniki xəstəliyi olanlar 35-36 dərəcədən yuxarı temperaturda, xüsusilə saat 10-16 radələrində açıq havada gəzməməlidirlər. Ümumiyyətcə, xroniki xəstəliyi, ürək-qan dövranı pozuntusu, yüksək qan təzyiqi, fiziki və əqli qüsuru olanlar, şəkərli diabet xəstələri meteohəssas insanlar qrupuna aiddir.
Nərgiz Kərimova qeyd edib ki, meteohəssas insanlar, xüsusilə ən çox xroniki xəstəliyi, ürək-damar xəstəliyi və təzyiqi olan insanlar gündəlik istifadə etdikləri dərmanları mütləq vaxtında qəbul etməlidirlər. Valideynlər uşaqlara nəzarət etməli və onları havaya uyğun geyindirməyi tövsiyə edirəm. Həmçinin asma xəstələri gərək quru yerlərdə olsunlar, revmatik xəstəliklərdən əziyyət çəkənlər isə rütubətdən uzaq, oynaqlarını quru və isti saxlamalıdılar:
"Hava proqnozlarında bu barədə xəbərdarlıq edilsə də, bəzən ona məhəl qoyulmur. Lakin havaya qarşı belə həssas olanların sayının on minlərlə olduğunu nəzərə alsaq, onda məsələyə ciddi yanaşmağa dəyər. Hava bizə uyğunlaşmasa da, biz ona uyğunlaşmağı bacarmalıyıq. Meteohəssaslıqdan qurtulmaq mümkün olmasa da, verilən tövsiyələrə diqqət yetirmək, həkim məsləhətlərinə əməl etməklə sağlamlığa qovuşmaq olar".
