Dünyada həkimlik qədər şəfalı, şəfqətli, xeyirxah və humanist peşə yoxdur. Bütün zamanlarda, xalqlar arasında həkim cəmiyyətin ən çox sevilən və hörmət edilən təbəqəsi sayılıb, onların haqqında hikmətli sözlər yazılıb. Seçdiyi peşəsindən, həyatdakı işindən, mövqeyindən asılı olmayaraq, hər kəsin qəlbində bu sənət sahiblərinə qarşı ali hisslər yaşayır.

Aztibb.az-ın "Həkimlərimizi tanıyaq!" rubrikasında söz açacağımız Azadə Əlişova da sevilən, seçilən həkimlərimizdəndir. O, bu günədək mənalı həyatını bütünlüklə şərəfli işinə, müqəddəs peşəsinə, insanların problemlərinə və sağlamlığına həsr edib.

Azadə Əlişova Mingəçevir Şəhər Mərkəzi Xəstəxanasının Doğum şöbəsinin Yeni Doğulmuşların İntensiv Terapiya bölməsinin həkim-neonatoloqudur. Həkim 1975-ci ildə Mingəçevir şəhərində anadan olub. 1993-1999-cu illərdə Azərbaycan Tibb Universitetinin Pediatriya fakültəsində təhsil alıb. 1999-2000-ci illərdə Mingəçevir ŞMX-da internatura keçib.

O, 2000-ci ildə Mingəçevir Şəhər “Ana və Uşaq” MSM-nın Poliklinika şöbəsində həkim-pediatr vəzifəsində əmək fəaliyyətinə başlayıb. 2003-2017-ci illərdə Mingəçevir ŞMX-nın Doğum evində həkim-neonatoloq işləyib. 2017-ci ildən Mingəçevir ŞMX-nın Doğum şöbəsinin Yeni Doğulmuşların İntensiv Terapiya bölməsində həkim-neonatoloq vəzifəsində çalışır.