Fevralın 7-də “Yeni Klinika” tibb müəssisəsində “Serebral iflic və cəmiyyət” mövzusunda forum təşkil olunub.

Aztibb.az xəbər verir ki, tədbirdə “Yeni Klinika”nın direktor vəzifəsini icra edən, baş həkim Cavid Paşayev, Sosial Xidmətlər Agentliyinin idarə heyətinin sədri Vüqar Behbudov, eləcə də Milli Paralimpiya Komitəsi, DOST İnklüziv İnkişaf və Yaradıcılıq Mərkəzi və digər təşkilatlardan rəsmi nümayəndələr iştirak ediblər.

Forumda Səhiyyə Nazirliyinin bir çox xəstəliklər, o cümlədən  serebral iflic xəstələrinin sağlamlıqlarının bərpasına yönəlmiş kompleks müalicə və profilaktika tədbirlərinin mütəmadi həyata keçirildiyi diqqətə çatdırılıb. Qeyd olunub ki, forumun əsas məqsədi serebral iflic olan gənclər arasında təcrübə mübadiləsi üçün vahid platforma yaratmaqdır.

Tədbirdə baş həkim Cavid Paşayev serebral iflic xəstələrinin, sağlamlıq imkanları məhdud olan həssas qrupun cəmiyyətə inteqrasiya imkanlarının genişləndirilməsinin əhəmiyyətindən danışıb.

Vüqar Behbudov isə çıxışında həssas əhali qrupları üçün dövlət tərəfindən həm stansionar, həm yarımstansionar sosial xidmətlərin təşkil edildiyini, Sabunçu və Abşeron rayonlarında yarımstansinonar mərkəzlərin yaradıldığını bildirib. Qeyd edib ki, ötən ildən istifadəyə verilən www.serebralders.az veb səhifəsi və xüsusi mobil tətbiq serebral iflic xəstəliyindən əziyyət çəkən uşaqların valideynlərinə, onların bacarıqlarının artırılmasına, bu istiqamətdə elektron resurslardan istifadənin genişlənməsinə dəstək məqsədi daşıyır. V.Behbudov valideynlərin evdə uşaqlarının reabilitasiyasına dəstək verə bilmələri üçün müxtəlif istiqamətlər üzrə videodərslərin hazırlandığını, həmin veb səhifədə və mobil tətbiqdə yerləşdirildiyini deyib. 

Forumda çıxış edən Milli Paralimpiya Komitəsinin baş katibi Kamal Məmmədov digər əlillik kateqoriyaları kimi serebral iflic xəstələrinin də tibbi təsnifata uyğun olaraq hansı idman növlərində iştirakının mümkün olduğunu sadalayıb: “Hazırda A və B mili komandaları üzrə 1200 idmançımız var. Bu idmançılar dəfələrlə yüksək nəticələr əldə ediblər. Məqsədimiz belə xəstələri idman vasitəsiylə cəmiyyətə inteqrasiya etməkdir”. 

DOST İnklüziv İnkişaf və Yaradıcılıq Mərkəzinin direktor müavini Nigar Məmmədova təmsil etdiyi təşkilatın Cənubi Qafqazda ilk unikal mərkəz olduğunu vurğulayaraq fəaliyyəti haqqında danışıb. O, Mərkəzin həssas əhali qrupları ilə bağlı davamlı olaraq layihələr həyata keçirdiyini qeyd edib.

TƏBİB-in icraçı direktorunun müşaviri, fizioterapevt Pərvin Əkbərov serebral ifliclə bağlı mövzunun cəmiyyət üçün aktual olduğunu və hər kəsin buna həssas yanaşmasının vacibliyini söyləyib: “Körpələr, gənclər gələcəyimizdir. Onların sağlamlığını dövlətimiz üçün qorumalıyıq… Təəssüflər olsun ki, dünya statistikasına görə, hər 1000 körpədən 2-si serebral ifliclə doğulur. Bu xəstəlik təxminən 80 faiz ana bətnində başlayır. Bizlər nə etməliyik? İlk növbədə, səhiyyə sistemində ana və uşağın sağlamlığı diqqətdə saxlanılmalı, hamilə qadına hamiləlik dövründə nəzarət olunmalıdır”.

O, qeyd edib ki, regionlara nəzər salsaq, serebral iflic xəstəsi olan uşaqların reabiltasiyaya yönəldilməsində çətinliklərlə üzləşildiyini görürük: “Biz TƏBİB olaraq, yeni bir modul və işçi qrupu əsasında regionlarda bununla bağlı fəaliyyətə başlamışıq. Onu da bildirim ki, icbari sığortanın yeni xidmətlər zərfinə serebral ifliclə bağlı xidmətlər də daxil edilib. Gələcəkdə regionlarda reabilitasiya üçün mərkəzlərin yaradılması qarşıda durur”.

Forumda həkim və mütəxəssislər xəstəliyin yaranma səbəbləri, fəsadları, müayinə və müalicə üsulları mövzularında təqdimatlar ediblər.

Sonda fiziki məhdudiyyətli gənclər çıxış ediblər.