Bu barədə Aztibb.az-a ETMGİ-dən məlumat verilib.

 

Konqresin ilk günü Türkiyədən dəvət olunan mütəxəssislər tərəfindən Səhiyyə Nazirliyi Elmi-Tədqiqat Mamalıq və Ginekologiya İnstitutunda kolposkopiya, laporoskopik histerektomiya, obstetrik ultrasonoqrafiya, pelvik prolapsa yanaşma kimi mövzularda master-klaslar keçirilib.

 

Beynəlxalq konqres Azərbaycan Respublikasının Dövlət Himninin və İstiqlal Marşının səsləndirilməsi ilə başlayıb.

  

Tədbirdə giriş nitqi ilə açan Elmi-Tədqiqat Mamalıq və Ginekologiya İnstitutunun direktoru, professor Cəmilə Qurbanova Ümummilli Lider Heydər Əliyevin Azərbaycan səhiyyəsində əvəzsiz rolundan bəhs edib. Bildirib ki, səhiyyənin inkişafı və əhalinin sağlamlığının qorunması üzrə həyata keçirilən islahatlarda ana və uşaq problemlərinin həlli ön sıralarda yer alır. Onun sözlərinə görə, Heydər Əliyevin fəaliyyəti dövründə qadın, ana və uşaqların mühafizəsinə yönəldilmiş qayğı bu gün də yüksək səviyyədə həyata keçirilir. Hazırda bu istiqamətdə Heydər Əliyev tərəfindən aparılan siyasəti onun layiqli varisi Azərbaycan Respublikasının Prezidenti İlham Əliyev uğurla davam etdirir.

 

C.Qurbanova, həmçinin Türkiyə ilə Azərbaycanın tibb işçilərinin mamalıq və ginekologiya sahəsindəki birgə fəaliyyətindən də danışıb.

 

"Reproduktiv endokrinologiya və sonsuzluq", "Uroginekologiya", "Laporoskopiya", "Ginekoloji onkologiya", "Ümumi ginekologiya", "Perinatologiya", "Endometrioz" və "Histeroskopiya" sessiyalarından ibarət olan konqresdə mamalıq və ginekologiya sahəsi ilə bağlı qlobal məsələlərə dair çıxışlar dinlənilib, tədbir iştirakçılarını maraqlandıran mövzularda müzakirələr aparılıb.

 

Elmi-Tədqiqat Mamalıq və Ginekologiya İnstitutunun II Mamalıq şöbəsinin müdiri Tənzilə Əliyeva, Köməkçi reproduktiv texnologiyalar şöbəsinin mama-ginekoloqu, t.ü.f.d., dosent Xəyalə Təhməzi, həkim mama-ginekoloq Aysel Bəyişova tərəfindən müxtəlif məzmunlu təqdimatlar edilib.

 

Konqresin son günü Türkiyə nümayəndə heyəti ilə birlikdə Fəxri xiyabanda Ümummilli Lider Heydər Əliyevin məzarı ziyarət edilib.

 

Tədbirin sonunda iştirakçılara sertifikatlar təqdim edilib.

 

Qeyd edək ki, Mamalıq və Ginekologiya üzrə V Beynəlxalq Konqres Azərbaycan Respublikası Səhiyyə Nazirliyinin Elmi Tibbi Şurası tərəfindən akkreditasiya olunub və 10 DTT kredit balı ilə qiymətləndirilib.