"Həkimlərimizi tanıyaq!" rubrikamızda Qəbələ Rayon Mərkəzi Xəstəxanasının direktorunun cərrahi işlər üzrə müavini Cəmil Ələkbərov haqqında məlumatları təqdim edirik

Cəmil Hüseyn oğlu Ələkbərov 1980-ci ildə Naxçıvan şəhərində anadan olub. 2004-cü ildə Azərbaycan Dövlət Tibb Universitetinin Müalicə işi fakültəsini bitirib. 2004-2006-cı illərdə Rusiya Federasiyası Kazan Tibb Universitetində cərrahiyyə ixtisası üzrə kliniki ordinatura, 2006-2009-cu illərdə Rusiya Federasiyası Kazan Tibb Akademiyasında aspirantura təhsili alıb və namizədlik dissertasiyasını vaxtından əvvəl bitirib.

O, 2009-2018-cı illərdə Elmi Tədqiqat Ağciyər Xəstəlikləri İnstitunda döş qəfəsi cərrahiyyəsi üzrə aparıcı elmi işçi vəzifəsində çalışıb. 2018-2023-cü illərdə Dövlət Təhlükəsizliyi Xidmətinin Hərbi Tibb Baş İdarəsində döş qəfəsi cərrahı kimi fəaliyyət göstərib.

Ölkəmizdə ilk dəfə olaraq narkozsuz ağciyər əməliyyatı icra etmiş Cəmil Ələkbərov həm də Ağciyər Cərrahiyyə Mərkəzini yaratmışdır. O, 20-dən çox elmi məqalənin müəllifidir.

Təcrübəli həkim 44 günlük Vətən müharibəsi dövründə də öz dəstəyini əsirgəməmişdir. Füzuli, Şuşa istiqamətlərində gedən döyüşlərdə yaralanan yüzlərlə əsgərlərimizin yarasına məlhəm olmuş, gecə-gündüz yorulmadan yaralılara qulluq etmişdir. Cəmil Ələkbərov göstərdiyi xidmətlərə görə medallarla təltif olunmuşdur.

O, 18 yanvar 2023-cü ildən Qəbələ Rayon Mərkəzi Xəstəxansında direktorun cərrahi işlər üzrə müavini vəzifəsində çalışır.