Uzaman həkim Serkan Güreser göz səyriməsinin göz qapağının nazik əzələləri arasında qeyri-ixtiyari, kortəbii kiçik sıxılmalar olaraq təyin olunduğunu bildirib. 

Aztibb.az cnnturk.com-a istinadən xəbər verir ki, bunun səbəb ola biləcəyi müxtəlif xarici amillər var. Göz səyriməsi heç bir xəstəliyin əlaməti deyil və heç bir göz xəstəliyinin və ya nevroloji xəstəliyin əsasında durmur. 

Adətən gözün yorğunluğu, kofein və ya spirt içki qəbulu göz səyriməsinin ən çox yayılmış səbəbləri kimi görünür. Göz yorğunluğu və ya görmə problemləri çox vaxt eynək ehtiyacı, yaxud kompüterdə həddən artıq işlədiyiniz zaman da baş verə bilər. 

Göz qapaqlarının səyrimə halları əsasən stresslə bağlıdır və bu ciddi xəstəlik sayılmasa da, diqqətinizə və məhsuldar olmaq qabiliyyətinizə mane ola bilər. Həkim tövsiyə edir ki, bunun üçün çox istirahət etməyə və stresdən uzaqlaşmağa çalışın. Çay, qəhvə və kola istehlakınızı azaldın. Bundan əlavə, səyrimə azalana qədər B vitamin kompleksi ilə gündəlik multivitamin əlavəsi qəbul etmək məsləhətdir. 

Ümumiyyətlə 3 gündən çox davam edən səyrimələr yaşayırsınızsa, üzünüzün və ya bədəninizin digər nahiyələrində səyrimə varsa, göz qapaqlarınız sallanırsa, işığa həssaslığınız yüksəkdirsə, ikili və ya bulanıq görməniz varsa, mütləq həkimə müraciət edilməlidir.