Bakı Baş Gömrük İdarəsində “Psixotrop maddələr, yeni növ sintetik narkotik vasitələr, hallüsinogenlər və prekursorlar” mövzusunda təlim keçirilib.

Mərkəzi Gömrük Hospitalından Aztibb.az-a verilən xəbərə görə, Azərbaycan Respublikası Dövlət Gömrük Komitəsinin müvafiq sərəncamına əsasən təşkil edilmiş maarifləndirici təlimdə Bakı Baş Gömrük İdarəsinin rəis müavini, gömrük xidməti polkovniki Yunis Əsgərli çıxış edərək narkomaniya ilə mübarizə istiqamətinin bütün dünya üçün qlobal əhəmiyyət kəsb etdiyini vurğulayıb. O, mövzu ilə bağlı gömrük əməkdaşlarının biliklərinin təkmilləşdirilməsinin önəmini qeyd edib.

Daha sonra Dövlət Gömrük Komitəsi Tibbi Xidmət İdarəsinin rəis müavini, t.ü.f.d., dosent İsmayıl Əfəndiyev İdarə tərəfindən narkotik vasitələrin və psixotrop maddələrin qanunsuz dövriyyəsi, o cümlədən qeyri-qanuni psixoaktiv maddələrin yaratdığı asılılıqlarla mübarizə istiqamətində həyata keçirilən fəaliyyətlər barədə məlumat verib.

Təlimdə Azərbaycan Respublikası Dövlət Gömrük Komitəsi Tibbi Xidmət İdarəsinin Elmi-Təcrübi və Tədris Mərkəzinin mütəxəssisi Şəhla Mirzəzadə “Narkotik vasitələr və psixotrop maddələr: müasir dünyanın qlobal çağırışı” mövzusunda çıxış edərək narkotik vasitələr və psixotrop maddələr barədə ətraflı məlumat verib. Eyni zamanda, Mərkəzi Gömrük Hospitalının həkim-psixiatrı İradə Ramazanova və Dövlət Gömrük Komitəsinin Tibbi Xidmət İdarəsinin Elmi-Təcrübi və Tədris Mərkəzinin mütəxəssisi Azad Əhmədov da təqdimatla çıxış edərək psixotrop maddələr və onların yaratdığı problemlər, o cümlədən saxta dərmanlar və onların yayılmasına qarşı mübarizədən danışıblar.

Təqdimatların sonunda iştirakçıları maraqlandıran suallar cavablandırılıb.

Qeyd edək ki, mövzu ilə əlaqəli təlimlər 2023-cü il ərzində gömrük əməkdaşları arasında sistemli şəkildə həyata keçiriləcək.