Azərbaycan Respublikası Səhiyyə Nazirliyi K.Y.Fərəcova adına Elmi-Tədqiqat Pediatriya İnstitutunda “Neonatal Reanimasiya Proqramı” (NRP) kursu keçirilib.

İnstitutdan Aztibb.az-a verilən xəbərə görə, tədbirdə müəssisənin direktoru, t.ü.f.d., dos. Allahverdi Musayev iştirakçılara kursun mahiyyətindən danışıb. Bildirib ki, yenidoğulmuşun reanimasiya prosedurları özünəməxsus xüsusiyyətlərə malikdir. O, neonatal ölümlərin qarşısının alınması üçün belə təlimlərin keçirilməsinin vacibliyini vurğulayıb.

Daha sonra institutun baş həkimi, uzman həkim Azər Əhmədov Neonatal Reanimasiya Proqramı (NRP) kursunun məqsədindən danışıb.

İki gün davam edən təlimdə iştirakçılara NRP kurs proqramına əsasən nəzəri bilikləri və praktiki bacarıqları təqdim edilib.

Doğuşa yardım xidməti göstərən tibb işçiləri – ginekoloq, neonatoloq, mama və tibb bacılarının iştirak etdiyi təlim proqramını müvəffəqiyyətlə bitirən kurs iştirakçılarına sertifikatlar təqdim olunub.