Azərbaycan Respublikası Elmi Tədqiqatların Əlaqələndirilməsi Şurasının (ETƏŞ) Biologiya, Aqrar və Tibb Elmləri üzrə Problem Şurasının 2023-cü ildə ilk iclası keçirilib. AMEA-nın vitse-prezidenti, problem şurasının sədri akademik İradə Hüseynova “Zoom” proqramı üzərindən keçirilən iclası açaraq gündəlikdə duran məsələlər haqqında şura iştirakçılarını məlumatlandırıb.

AMEA-dan Aztibb.az-a bildirilib ki, iclasda biologiya, tibb və aqrar elm sahələri üzrə 24 dissertasiya mövzusu müzakirəyə çıxarılıb. Dissertasiya mövzuları aqrar işçi qrupu üzrə a.e.d., prof. Mustafa Mustafayev, fiziki-kimyəvi biologiya işçi qrupu üzrə b.ü.f.d. Səbinə Ömərova və tibb işçi qrupu üzrə t.ü.f.d. Aynur Safıyeva tərəfindən təqdim edilib.

Akademik İradə Hüseynovanın rəhbərliyi ilə keçirilən müzakirələrdə problem şurasının, işçi qruplarının üzvləri, eləcə də iddiaçılar, müvafiq dissertasiya işlərinin elmi rəhbərləri və məsləhətçiləri də iştirak ediblər.

Müzakirəyə çıxarılmış bəzi mövzuların adında dəyişikliklər edilməklə 18 iş müsbət qiymətləndirilərək qeydiyyata alınıb, 6 iş təkrar baxılmaq üçün geri qaytarılıb.