Çuğundur kimi tərəvəzlər bədəndə qan oksigenləşməsini çoxaldan və dözümlülüyü artıran nitratlarla zəngindir. İngiltərədə aparılan bir araşdırma, çuğundur suyunun əzələ gücünü əhəmiyyətli dərəcədə artırdığını göstərib.

Aztibb.az-ın medimagazin.com.tr-yə istinadla xəbər verir ki, Böyük Britaniyanın Exeter Universitetinin alimlərinin araşdırmasına görə, çuğundur şirəsi zülal kokteylləri və ya məşqdən əvvəl qəbul edilən digər içkilər qədər təsirlidir.

Tədqiqat üçün 20 yaşlarında olan on sağlam kişi araşdırılıb. İştirakçılardan təcrübəyə başlamazdan əvvəl üç gün ərzində nitratları az olan pəhrizə riayət etmələri, məsələn, yarpaqlı tərəvəzlərdən uzaq durmaları istənilib. Daha sonra komandanın yarısına nitrat tərkibli içki, digər plasebo qrupuna isə süni tozlu içki təklif edilib.

Tədqiqatçılar elektrik impulslarından istifadə edərək əzələ gücünü və ya əzələlərin büzüldüyü zaman göstərdikləri qüvvəni ölçüblər. Onlar müəyyən ediblər ki, iştirakçılar tərəfindən istehsal olunan əzələ gücü məşqdən əvvəl əsl içki içən qrupda yeddi faiz daha yüksəkdir.

Alimlər nitrat içkisini qəbul edən insanların əzələlərində nitrat səviyyəsinin, içməyənlərə nisbətən daha yüksək olduğunu aşkar ediblər. Bədəndə nitratlar əzələlərə çatan oksigen miqdarını artıraraq qan damarlarını genişləndirməyə kömək edə bilər.