“Şərqi Zəngəzur İqtisadi Rayonunda 1 saylı Bərpa, Tikinti və İdarəetmə Xidməti” PHŞ-nin ofisində Dövlət Gömrük Komitəsinin Tibbi Xidmət İdarəsi tərəfindən maarifləndirici tədbir keçirilib.
Bu barədə Aztibb.az-a Mərkəzi Gömrük Hospitalından məlumat verilib.
Bildirilib ki, Dövlət Gömrük Komitəsinin Tibbi Xidmət İdarəsinin Elmi-Təcrübi və Tədris Mərkəzi tərəfindən təşkil olunmuş tədbirdə Şərqi Zəngəzur İqtisadi Rayonunda 1 saylı Bərpa, Tikinti və İdarəetmə Xidməti” PHŞ-nin Bərpa və yenidənqurma departamentinin müdiri Yalçın Məmmədov çıxış edərək ilan zəhərlənmələri, həşərat dişləmələri, o cümlədən müxtəlif zədələnmələr zamanı ilk tibbi yardımın göstərilməsi mövzusunun kifayət qədər aktual olduğunu bildirib. O, Dövlət Gömrük Komitəsinin Tibbi Xidmət İdarəsi və Mərkəzi Gömrük Hospitalı ilə əməkdaşlıqdan məmnun olduğunu deyərək, maarifləndirici tədbirlərin davamlı xarakter daşıyacağına inamını ifadə edib.
Daha sonda Dövlət Gömrük Komitəsinin Tibbi Xidmət İdarəsinin rəis müavini, t.ü.f.d., dosent İsmayıl Əfəndiyev, Mərkəzi Gömrük Hospitalının Təcili yardım şöbəsinin həkimi Cavad Cabbarov və Dövlət Gömrük Komitəsinin Tibbi Xidmət İdarəsinin Sanitar Karantin Xidmətinin əməkdaşı, təlimçi-instruktor Hüseyin Qasımov həkimə qədər ilk tibbi yardım, ilan, əqrəb, hörümçək və həşərat sancmaları, eləcə də müxtəlif zəhərlənmələr zamanı ilk tibbi yardım mövzusunda təqdimatlarla çıxış ediblər.
Tədbir zamanı nəzəri məlumatlarla yanaşı, iştirakçıların praktiki bacarıqları da inkişaf etdirilib. Belə ki, iştirakçılar öyrəndikləri nəzəri məlumatları təcrübədə tətbiq ediblər.
Sonda tədbir iştirakçılarını maraqlandıran suallar cavablandırılıb.
