Mütəxəssislər soyuqdəymə xəstəliyinin bağçaya və ibtidai siniflərə gedən şagirdlər arasında çox rast gəlindiyini və diqqətdən kənarda qaldıqda daha ağır xəstəliklərə səbəb olduğunu deyirlər. 

Aztibb.az cnnturk.com-a istinadən xəbər verir ki, uşaqların asan xəstələnməsinin qidalanmada əskikliklərdən xəbər verə biləcəyini qeyd edən mütəxəssislər xüsusilə bu mövsümlərdə uşaqların bol maye və C vitamini olan qidalarla qidalanmasının vacibliyini vurğulayırlar. 

Mövsüm dəyişikliyi səbəbindən uşaqların ən çox xəstələndiyi ərəfədir. Mütəxəssislər bildirirlər ki, bədən hərarəti 38 dərəcə ilə 38,9 dərəcə arasında olanda uşaq yaxşı görünürsə və heç bir narahatlıq əlaməti yoxdursa, narahat olmağa dəyməz. Qızdırmanın yüksəlməsi zamanı həkimə müraciət etməzdən əvvəl ailələrin öz imkanları ilə qızdırmanı azaltmağa çalışmalarını tövsiyə edən mütəxəssislər, belə olan halda öncə uşağın geyimini yüngülləşdirməyi vacib bilir. 

Otaq temperaturu 22-24 dərəcədən yuxarı olmamalıdır, bol maye verilməlidir. İsti duş qəbulu da faydalıdır. Uşağın yaşı 12-dən yuxarı olarsa bəzi qızdırmasalıcı dərmanlar istifadə edilə bilər.