Uşaqlıq boynu xərçənginin səbəbi insan papilloma virusu (HPV) adlı cinsi yolla keçən bir virusdur. HPV infeksiyalarının çoxu immun sistemi tərəfindən təmizlənir. 

Lakin uşaqlıq boynu hüceyrələrində yüksək riskli onkogen HPV növlərinin yaratdığı displastik zədələnmələr erkən diaqnoz qoyulub müalicə olunmazsa, uşaqlıq boynu xərçənginə çevrilir. 

Aztibb.az haberturk.com-a istinadən xəbər verir ki, uşaqlıq boynu xərçəngi döş və kolorektal xərçəngdən sonra ən çox görülən üçüncü növ xərçəngdir. Dünyada hər 2 dəqiqədə 1 qadının uşaqlıq boynu xərçəngindən dünyasını dəyişdiyini bildirən Dr. Duygu Gencer risk faktorlarını sadalayıb. 

Bu xərçəng növü üçün əsas risk faktorları HPV infeksiyası, xüsusilə erkən cinsi əlaqə, çoxlu sayda doğum, qeyri-düzgün gigiyena, aşağı sosial-iqtisadi səviyyə, siqaret çəkmə, düzgün qidalanmama, xüsusilə vitamin C, A, beta karotin və folat çatışmazlığı, xlamidiya kimi digər cinsi yolla ötürülən infeksiyalardır. 

Xəstəlik 20-li yaşlarda yüngül hüceyrə displazisi ilə başlayır və 40-dan sonra xərçəng mərhələsinə çatır. Buna görə də, lezyonları xərçəng mərhələsinə çatmadan adi ginekoloji müayinə mütləqdir. Müalicəni planlaşdırarkən digər vacib amil xəstənin uşaq sahibi olmaq istəyib-istəməməsidir. Xəstəlik xərçəngdən əvvəlki mərhələdə və ya erkən mərhələdə aşkar edilərsə və gələcəkdə uşaq istəyi olarsa uyğun xəstələrdə əməliyyat uşaqlıq və yumurtalıqların saxlanılması ilə aparılır.  

Erkən diaqnoz üçün müntəzəm ginekoloji nəzarət məsləhətdir. Xərçəngdən qorunmaq üçün HPV peyvəndi ilə yanaşı, immunitet sistemini gücləndirmək üçün mütəmadi olaraq idman etmək, sağlam qidalanmaq, siqaret çəkməmək, cinsi yolla bulaşan infeksiyalardan qorunmaq vacibdir.