Bu gün Xətai Tibb Mərkəzində 20 Yanvar şəhidlərini anma mərasimi keçirilib.

Bu barədə Aztibb.az-a Mərkəzdən məlumat verilib.

Əvvəlcə şəhidlərin xatirəsi bir dəqiqəlik sükutla yad edilib.

Sonra Xətai Tibb Mərkəzinin direktoru Ələkbər Tağıyev çıxış edərək bildirib ki, 1990-cı il yanvar faciəsinə aparan yol azərbaycanlıların Ermənistandakı tarixi torpaqlarından növbəti kütləvi deportasiyasının, Dağlıq Qarabağın Ermənistana birləşdirilməsi cəhdlərinin geniş vüsət aldığı 1987-ci ildən başlayıb: "Artan xətt üzrə davam edən gərginliyin qarşısını almaq əvəzinə, Sovet rəhbərliyi Azərbaycan xalqına qarşı dəhşətli cinayət işlədib”.

Tədbirdə çıxış edən həkim-terapevt Tofiq Şıxəliyevə 20 Yanvar hadisəsini xalqımızın şanlı tarixi adlandırıb. Qeyd edib ki, həmin günlər qanla yazılsa da, həm də şərəfli tariximizdir.

Digər çıxış edənlər bildiriblər ki, Azərbaycanın azadlığı və müstəqilliyi uğrunda öz canından keçən bütün şəhidlərimizin yolu gələcək nəsillərə nümunədir.

Tədbir tibb mərkəzinin rəhbərliyi və kollektivinin Şəhidlər xiyabanını ziyarəti ilə başa çatıb.