Binəqədi Tibb Mərkəzində 20 yanvar - Ümumxalq hüzn günü ilə bağlı tədbir keçirilib.

Mərkəzdən Aztibb.az-a verilən xəbərə görə, əvvəlcə qəhrəman şəhidlərimizin əziz xatirəsi bir dəqiqəlik sükutla yad edilib. Daha sonra 20 yanvar faciəsinə həsr olunmuş qısa film izlənilib.

Tədbiri giriş nitqi ilə açan Binəqədi Tibb Mərkəzinin direktoru Əsədulla Sultanov 20 yanvar tarixinin xalqımızın yaddaşında mühüm yer tutduğunu bildirib. O, müstəqillik uğrunda şəhidlik zirvəsinə ucalan qəhrəman şəhidlərimizin sayəsində bu gün üçrəngli bayrağımızın qürurla dalğalandığını qeyd edib. Direktor, həmçinin 1990-cı il yanvarın 19-dan 20-nə keçən gecə baş verən hadisələrin xalqımızın müstəqillik əzmini qıra bilmədiyini, xalqımızın qəhrəmanlığını bütün dünyaya sübut etdiyini diqqətə çatdırıb.

Daha sonra çıxış edən Binəqədi Tibb Mərkəzinin baş həkimi Rafiq Nağıyev 20 yanvar tarixində törədilmiş qətliama qarşı ilk çıxış edən siyasətçinin Ulu Öndər Heydər Əliyev olduğunu vurğulayıb. O, Ulu Öndərin özünü və ailəsini təhlükəyə ataraq Moskvada yerləşən daimi nümayəndəliyə gələrək çıxış etməsinin xalqını sevən müdrik liderin hər zaman xalqı ilə birlikdə olduğunun sübutu olduğunu bildirib.

Binəqədi Tibb Mərkəzinin Təcili və təxirəsalınmaz tibbi yardım şöbəsinin həkimi Nərmin Məmmədova isə çıxışında Vətənimizin bütövlüyü və azadlığı uğrunda canlarından keçən qəhrəman tibb işçilərininin əziz xatirəsininin xalqımızın qəlbində daima yaşayacağını qeyd edib.