Səhiyyə Nazirliyi İctimai Səhiyyə və İslahatlar Mərkəzində (İSİM) Pediatrik Təkmil Həyata Dəstək (PALS) təlim kursu keçirilib.

İSİM-dən Aztibb.az-a verilən xəbərə görə, təlimin təşkilində məqsəd tibb işçilərinin bilik və bacarıqlarının təkmilləşdirilməsi olub.

Amerika Ürək Assosiasiyasının (AHA) İSİM-də yerləşən rəsmi təlim məkanında keçirilən ikigünlük təlim zamanı iştirakçılara tənəffüs çatışmazlığının diaqnostikası və müalicəsi, təxirəsalınmaz vəziyyətlər zamanı istifadə olunan dərmanlar, uşaqlarda aritmiyalar, şok senariyaları və intraosseoz yolun təmin edilməsi, ürək dayanması və respirator çatışmazlıq hallarının vaxtında aşkar edilməsi mövzuları barədə geniş məlumat verilib. Həmçinin bu istiqamətdə praktik tətbiqetmə-simulyasiya təcrübələri həyata keçirilib.

Təlimlər İSİM-in Səhiyyə siyasəti və planlaşdırma şöbəsinin həkim-metodisti Könül İsmayılova tərəfindən aparılıb.

Təlim Səhiyyə Nazirliyinin Elmi Tibbi Şurası tərəfindən akkreditasiya olunmuş və 12 DTT kredit balı ilə qiymətləndirilib.

Qeyd edək ki, Pediatrik Təkmil Həyata Dəstək (PALS - Pediatric Advanced Life Support) Amerika Ürək Assosiasiyası/Amerika Kardiologiya Cəmiyyəti və Amerika Pediatriya Akademiyası tərəfindən tibb mütəxəssislərinin davamlı tibbi təhsil və praktik vərdişlərinin təkmilləşdirilməsi üçün hazırlanmış təlimdir.