İnstitutdan Aztibb.az-a bildirilib ki, hamiləliyin 28-ci həftəsində təcili şəkildə vaxtından əvvəl doğuş təhlükəsi ilə müəssisəyə gətirilən qadın Hamiləliyin Patologiyası şöbəsinin müdiri, t.ü.f.d. Zinyət Muradova tərəfindən müayinə olunduqdan sonra stasionar müalicə üçün şöbəyə hospitalizasiya olunub. Uşaqlıq boynunun çatışmazlığı (istmiko-servikal çatışmazlıq), vaxtından əvvəl doğuş təhlükəsi ilə stasionar müalicə planı təyin olunan qadının hamiləliyi həkim nəzarəti altında 34-cü həftəyə qədər çatdırılıb. Şüa-diaqnostika üzrə həkim Təranə Kərimova tərəfindən daimi şəkildə anaya ultrasəs müayinə icra olunub, vaxtında təyin olunan düzgün diaqnozlar ilə müalicə planı təyin edilib.

 

Vəziyyəti ilə əlaqədar Z.Muradova tərəfindən təcili qeysəriyyə kəsiyi icra olunub. Fəsadsız keçən əməliyyatdan sonra çəkisi 1900 qram, cinsi qadın olan ilk körpə, çəkisi 2060 qram, cinsi qadın olan ikinci körpə dünyaya gəlib. Əkizlər daimi şəkildə Yenidoğulmuşların Reanimasiya və İntensiv Terapiyası şöbəsinin həkim-neonatoloqu Günel Xəlilova, şüa-diaqnostika üzrə həkim T.Kərimova və tibbi heyətin nəzarəti altında olub.

 

Vaxtından əvvəl doğulma, doğuş zamanı az bədən çəkisi diaqnozları ilə dünyaya gələn əkizlərdən birinin heç bir reanimasion tədbirə ehtiyacı olmayıb. Çəkisi 1900 qram olan yenidoğulmuşun vəziyyəti təxminən 10 günlük stasionar müalicə planı ilə normallaşıb.

 

Uğurlu müalicə taktikasından sonra əkizlər ailəsi ilə birlikdə evə yola salınıb.