Mingəçevir Şəhər Mərkəzi Xəstəxanasının 1 saylı Ailə Sağlamlıq Mərkəzinin həkim-terapevti Gülnarə İbrahimova mədə və onikibarmaq bağırsağın xora xəstəliyi barədə Aztibb.az-a qısa məlumat verib.

 

Həkim bildirib ki, mədə və onikibarmaq bağırsağın xora xəstəliyi orqanın selikli qişasından qüsurun - xoranın əmələ gəlməsi ilə nəticələnən xroniki residivləşən xəstəlikdir. Xoranın əmələ gəlməsinə psixoemosional gərginlik, qeyri-düzgün qida rejimi, qida ilə bərabər çoxlu ədviyyat qəbulu, konservatların istifadə edilməsi, nəzarətsiz və əsassız dərman qəbulu kimi amillər şərait yaradır.

 

Gülnarə İbrahimovanın sözlərinə görə, xəstəliyin daha çox yayılmış əlamətləri döş sümüyü altında ağrılar, ürəkbulanma, qusma, qıcqırmadır. Ağrılar, adətən, qida qəbulu ilə bağlıdır, 30-40 dəqiqə əvvəl (erkən ağrılar) və ya 1,5-2 saat sonra (gecikmiş ağrılar) yaranır. Gecikmiş ağrılar onikibarmaq bağırsaq xoraları zamanı baş verir.

 

"Xəstəlik müalicə edilmədiyi halda mədə qanaxması, xoranın deşilməsi, başqa orqanlara yayılması, hətta onkoloji xəstəliyin inkişaf etməsi kimi ciddi fəsadlar yarana bilər. Bu xəstəliyin inkişafının qabağını almaq üçün, ilk növbədə pəhrizin gözlənilməli və qida rejiminə xüsusi diqqət yetirilməlidir", - deyə o, bildirib.