Paketləşdirilmiş şirələri mütəmadi olaraq içmək sağlamlığa zərər verir.

Aztibb.az medikforum.ru-ya istinadla xəbər verir ki, bu barədə həkim-qastroenteroloq, diyetoloq, tibbi üzrə fəlsəfə doktoru İrina Berejnaya məlumat verib. 

Diyetoloq paketləşdirilmiş şirələrin orqanizmə neqativ təsiri haqqında xəbərdarlıq edib. Mütəxəssis onların tərkibində iltihabi reaksiyalar yaratmaq imkanına malik olan kimyəvi maddələrin mövcud olduğunu qeyd edib.

"Bu şirələrin tərkibində konservantlar, stabilizatorlar, boyalar və aromatizatorlar mövcuddur", - deyə həkim bildirib.

Ekspert qeyd edib ki, paketlərdə olan şirələr şəkərin çox yüksək konsentrasiyalarını özündə saxlayır. Həkimin sözlərinə görə, alma şirəsinin bir stəkanında 5 almanın tərkibində olduğu qədər şəkər mövcuddur. Diyetoloq xəbərdarlıq edib ki, eyni anda çox miqdarda şəkər qəbulu mədəaltı vəzinin işinə mənfi təsir edə, endokrin problemlərin inkişafına, insulinin həddən artıq yüksəlməsinə və qanda şəkərin səviyyəsinin kəskin sıçrayışına səbəb ola bilər.