Bu gün Lənkəran Rayon Mərkəzi Xəstəxanasının tabeliyindəki Lənkəran Regional Perinatal Mərkəzin fəaliyyətə başlamasının bir ili tamam olur.
Mərkəzdən Aztibb.az-a bildirilib ki, bu münasibətilə keçirilən tədbirdə Lənkəran Rayon Mərkəzi Xəstəxanasının direktoru Ağabala Kəlbiyev müəssisənin tibb personalını və gələn qonaqları salamlayıb. Bir il ərzində qazanılan nailiyyətlərdən danışan A.Kəlbiyev son illərdə icbari tibbi sığorta sisteminə keçiddən sonra səhiyyə sistemində aparılan islahatlardan, bu sahədə mövcud problemlərin əsaslı surətdə həllindən, Perinatal Mərkəzin ana olmağa hazırlaşan qadınlara, o cümlədən dünyaya yenicə göz açan körpələrə yüksəkixtisaslı diaqnostik, konsultativ və müalicə yardımı göstərməsindən bəhs edib. O, mərkəzin binasının ən son tələblərə cavab verən tibb müəssisəsi kimi layihələşdirilərək yenidən qurulduğunu bildirib.
Tədbirdə çıxış edən qonaqlar Mərkəzin fəaliyyətini yüksək qiymətləndirərək, regionda bu tip müəssisələrin yaradılmasını hamilə qadınlara və dünyaya gələn körpələrə dövlət qayğısının təzahürü kimi dəyərləndiriblər.
Bildirilib ki, mərkəx direktor Nuridə Məmmədovanın rəhbərliyi altında ilklərə imza atmaqda davam edir. Belə ki, UNİCEF və TƏBİB-in birgə əməkdaşlığı çərçivəsində "Körpə Dostu Klinikası Təşəbbüsü" layihəsi üzrə növbəti yekun toplantıda Lənkəran Regional Perinatal Mərkəz respublika üzrə birinci yeri tutub. Həmçinin “Azərbaycanın cənub bölgəsində təhlükəsiz analıq” pilot layihəsinin icrasına Lənkəran Regional Perinatal Mərkəzin seçilməsi regionda tibb müəssisəsinin nüfuzunun getdikcə artmasının təzahürüdür.
Sonda Mərkəzin direktoru Nuridə Məmmədova çıxışında tibb müəssisəsində yaradılan şəraitə və diqqətə görə direktor A.Kəlbiyevə təşəkkürünü bildirib.
