Dializ müalicəsi alan hər bir pasiyentin düzgün qidalanma proqramından (pəhriz) faydalanması üçün həkimlə konsultasiyası məsləhət görülür.

 

Dializ alan pasientlərin həyatını rahat davam etdirməsində düzgün qidalanma ən vacib yerlərdən birini tutur. Dializ böyrəklərin funksiyasını yerinə yetirir. Amma bilirik ki, dializ, bu işi, sağlam bir insanın böyrəyi qədər yaxşı yerinə yetirə bilməz. Nəticə etibarilə, orqanizmdəki artıq və zərərli maddələrin tam olaraq təmizlənməsi mümkün olmur.

 

Aztibb.az xəbər verir ki, bu barədə həkim-nefroloq Barat Yusubov məlumat verib. 

 

Həkimin sözlərinə görə, dializ alan pasiyent, düzgün qidalanırsa, bu zaman orqanizmdə zərərli maddələr daha az toplanır və meydana çıxa biləcək şikayətlər də (bulantı, qusma, qan təzyiqin yüksəlməsi, nəfəs darlığı) qismən də olsa, azalır. Sağlam insanlarda olduğu kimi, dializ xəstələri də lazım olan enerjini ilk öncə karbohidrat və yağlardan alır. Əgər lazımi miqdarda kalorini verə bilən məhsullar qəbul edilməzsə, o zaman vücud enerji ehtiyacını qarşılamaq üçün orqanizmin təməl ehtiyatlarına üz tutur. Buna bağlı olaraq isə, pasiyentlərdə halsızlıq, zəiflik və infeksiyalara qarşı həssaslıq kimi hallar meydana çıxa bilər. 

 

B.Yusubov qeyd edib ki, dializ alan pasientə qidalanma proqramı hazırlanarkən, onun qan analizlərinə baxılmalı, böyrək xəstəliyindən başqa hər hansı başqa sağlamlıq problemlərinin: şəkərli diabet, qaraciyər və ürək-damar problemlərinin olub-olmaması da nəzərə alınmalıdır.