Spontan baş vermiş üçəm hamiləlik ilə Elmi-Tədqiqat Mamalıq və Ginekologiya İnstitutuna (ETMGİ) müraciət edən qadın II Mamalıq şöbəsinin müdiri Tənzilə Əliyevanın daim nəzarətində olub. Uşaqlıq boynu çatışmazlığı diaqnozu ilə II trimestrdə müvafiq müalicələr təyin olunan pasiyentə servikal tikiş qoyulub.

İnstitutdan Aztibb.az-a bildirilib ki, riskli keçən period 34-cü həftəyə qədər çatdırılıb. Hamiləliyin 34-cü həftəsində dölyanı mayenin vaxtından əvvəl axması ilə təcili şəkildə T.Əliyeva tərəfindən qeysəriyyə kəsiyi icra edilib.

Əməliyyatdan öncə respirator distres sindromunun profilaktikası məqsədilə görülən tədbirlər öz nəticəsini verib, vaxtından əvvəl dünyaya gəlmələrinə baxmayaraq üçəmlərə heç bir reanimasion tədbirin icra olunmasına ehtiyac olmayıb.

İki qız, bir oğlan olan körpələr sağlam şəkildə ailələri ilə birlikdə evə yola salınıblar.