Səhiyyəmizin inkişafı, ilk növbədə, peşəkar mütəxəssislərdən - həkimlərdən və digər tibb işçilərindən aslıdır.

Ən dəyərli nemət olan sağlamlığın keşiyində duran həkimlərimizdən biri də Rəvanə Adıgözəlovadır.

"Həkimlərimizi tanıyaq!" rubrikasında söz açacağımız Rəvanə Məhəmməd qızı Adıgözəlova mənalı həyatını bütünlüklə şərəfli işinə, müqəddəs peşəsinə, insanların problemlərinə və sağlamlığına həsr edib.

O, 17 iyun 1971-ci ildə Quba rayonunda anadan olub. 1988-1990-ci illərdə Bakı şəhər 2 nömrəli Baza tibb kollecində, daha sonra isə Azərbaycan Dövlət Tibb Universitetinin Müalicə profilaktika fakültəsində təhsil alıb. 1996-1997-ci illərdə Bakı şəhəri 4 nömrəli Klinik Xəstəxanada internatura keçib.

Əmək fəaliyyətinə 1997-ci ildən Quba Rayon Mərkəzi Xəstəxanasının Doğum evinin Reanimasiya şöbəsində həkim-reanimatoloq kimi başlayıb. 2001-2002-ci illərdə Quba rayonu Vladimirovka kənd Sağlamlıq Mərkəzində terapevt, 2002-2010-cu illərdə Quba MDM Hemodializ şöbəsində nefroloq işləyib.

Rəvanə Adıgözəlova hazırda Quba Rayon Mərkəzi Xəstəxanasında həkim-nefroloq kimi fəaliyyətini davam etdirir.