Oğuz Rayon Mərkəzi Xəstəxanasının rəhbərliyinin təşkilatçılığı ilə Oğuz rayonunda olan şəhid ailələri ziyarət edilir.

 

Xəstəxanadan Aztibb.az-a verilən xəbərə görə, əzəli Azərbaycan torpaqlarının işğaldan azad edilməsi uğrunda canlarından keçərək bizə qələbəni bəxş edən, özləri şəhidlik zirvəsinə ucalan Vətən müharibəsi şəhidlərinin ailələrinə mənəvi dəstək olmaq üçün xəstəxananın SİHİ-nın sədri Qorxmaz Hümmətli və müharibə iştirakçıları ilə iş üzrə mütəxəsisi İlyas Afiyev şəhid Fərid Zaməddinovun ailəsinə baş çəkiblər.

 

Ziyarət zamanı şəhidin ailə üzvlərilə söhbət aparılaraq Ali Baş Komandanımızın rəhbərliyi ilə şəhidlərimizin qisasının alındığını və düşmənə layiqli cavab verildiyini qeyd edilib. Bildirilib ki, Azərbaycan Ordusu dövlətimizin qüdrətinin nümunəsi olmaqla yanaşı, həm də  xalqımızın qürur yeridir.

 

Qeyd edək ki, Azərbaycan Ordusunun giziri olmuş Fərid Zaməddinov 2020-ci il sentyabrın 27-də Azərbaycan Silahlı Qüvvələri tərəfindən Ermənistan işğalı altında olan ərazilərin azad edilməsi və Azərbaycanın ərazi bütövlüyünün bərpa olunması üçün başlanan Vətən müharibəsi zamanı Murovdağ döyüşlərində, həmçinin Talış qəsəbəsinin azadlığı uğrunda gedən ağır döyüşlərdə vuruşaraq qəhrəmancasına şəhid olmuşdur. O, ölümündən sonra "Vətən uğrunda" medalı ilə təltif edilmişdir.