“Tibbi Ərazi Bölmələrini İdarəetmə Birliyi” publik hüquqi şəxsin (TƏBİB) strukturunda İctimaiyyətlə əlaqələr və marketinq departamenti yaradılıb.
TƏBİB-dən Aztibb.az-a verilən məlumata görə, qurumun İcraçı direktoru Vüqar Qurbanovun əmri ilə yeni yaradılan departamentin rəhbəri vəzifəsinə Zamirə Ədilova təyin olunub. O, bu təyinatadək TƏBİB-in İctimaiyyətlə əlaqələr və tədbirlərin təşkili şöbəsinin müdiri idi.
Qeyd edək ki, Bakı Dövlət Universitetinin Jurnalistika fakültəsinin məzunu olan Zamirə Ədilova uzun müddət Rəqəmsal İnkişaf və Nəqliyyat Nazirliyində İctimaiyyətlə əlaqələr üzrə menecer, SOCAR-ın Bakı Ali Neft Məktəbində İctimaiyyətlə əlaqələr şöbəsinin rəisi vəzifəsində çalışıb.
Səmərəli fəaliyyətinə görə dəfələrlə "Fəxri fərman” və "Təşəkkürnamə” ilə təltif olunub. Bir çox jurnalist müsabiqəsinin qalibi, ictimaiyyətlə əlaqələr, risk kommunikasiyası, idarəetmə üzrə təlimlərin iştirakçısı, 100-dən çox publisistik, 1 elmi məqalənin müəllifidir.