Əsrimizin geniş yayılmış xəstəliklərindən biri də öd daşı xəstəliyidir. Öd daşı xəstəliyini hətta mədə-bağırsaq xorası, ürək xəstəlikləri ilə bir sıraya qoymaq olar. Demək olar ki, herontoloji pasiyentlərin 70%-i öd kisəsinin sancılarından əziyyət çəkirlər və bu pasiyentlərin əksəriyyəti qadınlardır. Pasiyentlər çox vaxt bu problemlə rastlaşdıqda həkimə müraciət etmirlər. Ancaq bilmək lazımdır ki, bu xəstəliyin fəsadları ağır olur.

 

Aztibb.az xəbər verir ki, bu barədə Mingəçevir Şəhər Mərkəzi Xəstəxanasının həkimi, ümumi cərrah Qnyaz Yusifli məlumat verib. 

 

Həkim bildirib ki, xəstəlik tədricən inkişaf edir, az hərəkətli həyat tərzi, çox yağlı qida, vaxtsız qidalanma öd durğunluğuna səbəb olur. Çox hallarda irsi faktor, öd yollarının bitişməsində öd daşı xəstəliyini əmələ gətirir.

 

Q.Yusiflinin sözlərinə görə, öd daşı xəstəliyi səhərlər uzun müddət ağızda acılıq, yeməkdən sonra sağ qabırğaaltı nahiyədə sızıldayan ağrı və s. simptomlarla özünü büruzə verir. Xəstələr bu kiçik narahatlıqlara əhəmiyyət vermədən yağlı, acılı, qızardılmış yeməkdən yeyirlər və belə həyat tərzinin nəticəsi də sonrakı dövrlərdə xəstəliyin daha ağır mərhələyə keçməsi, sağ tərəfli ağrıların güclənməsi, ağrının kürək nahiyəsinə irradiyasiya etməsi müşahidə olunur.

 

"Bəzən xəstələr ağrı simptomlarını ürək ağrıları ilə səhv salırlar. Çünki yayılmış ağrılar sol tərəfə meyilli olurlar. İltihabi proses aktivləşdikcə pasiyentdə temperaturun artması, qusma, köp, titrəmə əlamətləri də müşahidə edilir. Pasiyentlərin qarın nahiyəsini ilk müayinəsi zamanı qaraciyər və diafraqmal hissədə güclü ağrının olmasını təyin edilir. Öd sancılarının uzun müddətli olması kəskin xolesistit əlamətlərinə gətirib çıxara bilər və belə halda xəstələri əməliyyat etmək gərəkdir".

 

Həkim qeyd edib ki, belə xəstələrə ev şəraitində ilk yardım göstərdikdə, öncə xəstəni yatağa uzadılmalı, sağ qabırğaaltı nahiyəyə soyuq qoymalı ki, ağrı simptomu azalsın, həmçinin ağrıkəsici preparatlar verilməlidir. Əgər bu yardımdan sonra da ağrılar keçməzsə o zaman pasiyent xəstəxanaya çatdırılmalı və lazım gəldikdə əməliyyat olunmalıdır.