Orqan nəqlində yeni orqanın bədənə uyğunlaşması üçün xəstənin immun sistemi xüsusi preparatlarla basqılanır. Çünki orqan transplantasiyası keçirmiş xəstə, yenidoğulmuş körpə qədər bütün ətraf mühit infeksiyalarına qarşı həssasdır. Buna görə bu xəstələr, daha diqqətli qorunmalı və mümkün qədər heç bir infeksiyaya yoluxmamalıdırlar.

 

Aztibb.az xəbər verir ki, bu barədə nefroloq Barat Yusubov bildirib. 

 

Həkimin sözlərinə görə, transplantasiya keçirmiş bir xəstənin xüsusi qulluğa ehtiyacı olmasa da, immun sisteminə təsir edən dərmanlar qəbul etdiyi üçün karantində (cəmiyyətdən uzaq) olmalıdır:

 

"Əməliyyatdan bir həftə sonra, karantin qaydaları izah olunub, xəstə evə buraxıla bilər. Xəstə bir ay boyunca tibbi maska ilə gəzməli, cəmiyyət içinə məcbur olmadıqca çıxmamalıdır. İlk aydan sonra dərmanların dozası düşdükcə, xəstə sosiallaşmağa başlaya bilər".

 

B.Yusubov qeyd edib ki, xəstə ilk 3 ay ərzində, həftədə bir, sonra 2 həftədə bir, 6 aydan sonra ayda bir, 1 ildən sonra isə 6 ayda bir müayinəyə dəvət olunur.  Müayinə tarixləri, nefroloqun, nefroloji mərkəzin və xəstənin seçimi və ehtiyacına uyğun təyin olunur. Nefroloq tərəfindən orqan rəddinin vücudda yarada biləcəyi fərqli problemlərin təqib edilib dərhal müdaxilə edilməsi vacibdir.