ABŞ-ın Ohayo ştatında son iki ayda 82 uşaqda qızılcaya yoluxma aşkarlanıb.

Aztibb.az-ın medimagazin.com.tr-yə istinadla xəbərinə görə, Ohayo ştatının rəsmiləri noyabr ayında Franklin bölgəsindəki uşaq bağçasında dörd uşağa qızılca diaqnozu qoyulduğunu və onların xaricə səyahət etmədiklərini bildiriblər. Həmçinin bu uşaqların qızılcaya qarşı peyvənd edilmədiyi qeyd olunub.

Ohayoda son iki ayda qızılca diaqnozu qoyulan uşaqların sayının ən azı 82 olduğunu deyən ştat rəsmiləri onlardan 32-nin xəstəxanada müalicə olunduunu bildiriblər.

Uşaqların əksəriyyətinin yaşı 5 yaşdan aşağıdır.

ABŞ-ın Xəstəliklərə Nəzarət və Qarşısının Alınması Mərkəzi qızılcanın sadəcə bir səpgi olmadığı, körpələrdə və kiçik yaşlı uşaqlarda təhlükəli ola biləcəyi barədə valideynlərə xəbərdarlıq edib.

Qızılca tənəffüs yolları ilə yoluxur və qızdırma, öskürək, səpgi, burun axması, halsızlıq kimi əlamətlərə səbəb olur.

Qeyd edək ki, ABŞ-da 2020-ci ildə 13, 2021-ci ildə isə 49 nəfərdə qızılcaya yoluxma aşkar edilmişdi.