Qışda infarkt riski 4 dəfə artır. Bu, soyuq havalarda damarların həddindən artıq daralması və qan laxtalanmasının artması ilə əlaqədardır.

Aztibb.az xəbər verir ki, bu barədə Liv Bona Dea Hospitalının həkimi, tanınmış ürək-damar cərrahiyyə uzmanı Cabir Gülmalıyev məlumat verib.

Onun sözlərinə görə, ürək soyuq havada daha da aktivləşərək, ətrafını isidir və bədəni rahatlaşdırır. Lakin xəstə və çatışmazlığı olan ürək kifayət qədər aktivlik nümayiş etdirə bilmədiyi üçün problemlər ortaya çıxır.

Uzman həkim bildirib ki, çox soyuq havalarda yorucu və uzun gəzintilər edilməməlidir. Bu zaman ürək yorulur və soyuq hava infarkt keçirməyə səbəb olur: "Həmçinin qışda daha çox duzlu və yağlı qidalar istehlak edilir. Qış gələndə xəstələr evlərinə qapanırlar, idmandan uzaqlaşırlar. Bu da onların kökəlməsinə və beləliklə də ürək xəstəliklərinin artmasına və ya yaranmasına səbəb olur".

Cabir Gülmalıyev əlavə edib ki, qışda yüksək kalorili, yağlı ət və ət məhsulları yerinə daha çox təzə tərəvəz və meyvələrin qəbulunu artırmaq lazımdır. Bundan başqa, qanınızın qatılaşmasını hər daim nəzarətdə saxlamalısınız.