29 dekabr 2022-ci il tarixində Səhiyyə Nazirliyi İctimai Səhiyyə və İslahatlar Mərkəzi (İSİM) tərəfindən orta məktəblər arasında keçirilən sorğuların nəticələri müzakirə olunub.
Mərkəzdən Aztibb.az-a bildirilib ki, İSİM-in direktoru Qəhrəman Haqverdiyev qurum tərəfindən keçirilən sorğuların və maarifləndirilmə işlərinin uğurlu nəticələrindən danışıb. Bildirib ki, məktəblilərin sağlamlıqlarının qorunması və xəstəliklərin profilaktikası istiqamətində aparılan işlər gənc nəslin sağlam formalaşmasına kömək edəcək və öz uğurlu töhfələrini verəcək.
Daha sonra İSİM-in Monitorinq və təhlil şöbəsinin müdiri İnara Makayeva “Sağlamlığı təşviq edən məktəblər” (SHE) layihəsi barədə geniş təqdimatla çıxış edib. Diqqətə çatdırıb ki, layihənin keçirilməsində məqsəd məktəblilər arasında sağlamlıq biliklərini formalaşdırmaq, zərərli vərdişlərdən uzaq olmağa çağırmaq, sağlam olmayan həyat tərzi səbəbindən orqanizmdə baş verə biləcək fəsadları diqqətə çatdırmaq idi.
İctimai sağlamlıq şöbəsinin müdiri Tofiq Musayev isə çıxışında bildirib ki, 2022-ci ilin fevral-mart aylarında keçirilən sorğu tədqiqatı Bakı şəhərinin 10 ümumtəhsil məktəbində pedaqoji heyət arasında baş tutub və sağlam həyat tərzinin əsaslarına dair gənc nəslin məlumatlandırılması istiqamətində təhsil işçilərinin fikir və təklifləri öyrənilib.
Sonda keçirilən sorğular və gələcək planlar barəsində geniş fikir mübadiləsi aparılıb.