Şəmkir Rayon Mərkəzi Xəstəxanasında 31 Dekabr - Dünya Azərbaycanlılarının Həmrəylik Günü və qarşıdan gələn Yeni il ilə əlaqədar tədbir keçirilib.

Tədbirdə Şəmkir RMX-nın direktoru Emin İsmayılov bütün tibb işçilərini əlamətdar gün münasibətilə təbrik edib. Bildirib ki, hər birimiz üçün əziz və doğma bayram olan Dünya Azərbaycanlılarının Həmrəylik Gününün əsası dünyanın müxtəlif ölkələrində yaşayan soydaşlarımızın birliyinin yaradılması məqsədilə Ümummilli Liderimiz Heydər Əliyev tərəfindən qoyulmuşdur. Bu əlamətdar günün təsis edilməsi həm də müxtəlif ölkələrdə yaşayan həmvətənlərimiz arasında siyasi-iqtisadi, mədəni münasibətlərin genişlənməsinə geniş imkanlar yaratmışdır.  

İnzibati işlər üzrə müavin Emin İsayev və Həmkarlar İtifaqının sədri həkim Şahin Rzayev Dünya Azərbaycanlılarının Həmrəylik Gününün yaranması tarixindən və onun əhəmiyyətindən danışıb, tibb işçilərini təbrik ediblər.

Daha sonra Şəmkir RMX-da çalışan 100 nəfər işçiyə hədiyyə (ərzaq) paketləri təqdim edilib. Bunlardan 30 nəfəri şəhid ailəsi, veteran və qazilər, 23 nəfəri isə 44 günlük Vətən müharibəsində iştirak etmiş sürücülər olub.