Tərtər Rayon Mərkəzi Xəstəxanasının əməkdaşları Vətənimizin ərazi bütövlüyü uğrunda canlarından keçmiş şəhid Əhmədzadə Məftun Seymur oğlunun, Əhmədzadə Mürşüd Müdahil oğlunun və Hacızadə Ceyhun İfrayıl oğlunun, eləcə də qazi Niftaılyev Məhəbbət Ədalət oğlunun ailələrinə baş çəkiblər.

 

Aztibb.az-ın xəbərinə görə, xəstəxana əməkdaşları onlarla həmsöhbət olub, mənəvi dəstəklərini ifadə ediblər.

 

Görüşlər zamanı şəhidlərimizin müqəddəs amal uğrunda canlarından keçdiyi və onların əziz xatirəsinin Azərbaycan xalqının qəlbində əbədi yaşayacağı qeyd edilib. 

 

Həmçinin şəhidlərimizin, qazilərimizin ailələrinə xidmət göstərməyin həkimlərimiz üçün qürurverici olduğu, bu cür ziyarətin kökündə ölkə başçısının və rayon rəhbərliyinin dövlət qayğısının dayandığı vurğulanıb. 

 

Daha sonra şəhid və qazi ailələrinin üzvləri evlərində müayinə olunublar.

 

Şəhid ailələri sağlamlıqlarının keşiyində dayanan həkimlərimizə nümunəvi təşəbbüsə görə razılıqlarını bildiriblər. Şəhid ailəsi kimi onlara göstərilən diqqət və qayğıya görə ölkə Prezidentinə, Birinci vitse-prezidentə, rayon rəhbərliyinə minnətdarlıqlarını çatdırıblar. 

 

Xatırladaq ki, Əhmədzadə Məftun 12 sentyabr 2022-ci ildə düşmənin Daşkəsən, Laçın və Kəlbəcər istiqamətində genişmiqyaslı təxribatlarının qarşısını alınması zamanı şəhid olub.

Şəhid Əhmədzadə Mürşüd 06 oktyabr 2020-ci ildə Suqovuşan istiqamətində gedən döyüşlər zamanı şəhid olub. Azərbaycan Respublikası Prezidentinin Sərəncamına əsasən o, "Vətən uğrunda", "Suqovuşanın azad olunmasına görə", "Cəsur döyüşçü" medalları ilə təltif olunub.

Şəhid Hacızadə Ceyhun 07 oktyabr 2020-ci ildə Suqovuşan istiqamətində gedən döyüşlər zamanı şəhid olub. Azərbaycan Respublikası Prezidentinin Sərəncamına əsasən "Vətən uğrunda" və "Suqovuşanın azad olunmasına görə" medalları ilə təltif olunub.