"Beynəlxalq təhlillər göstərir ki, 15-19 yaşlı qızlar arasında əsas ölüm səbəbi hamiləlikdir".

Aztibb.az xəbər verir ki, bunu Səhiyyə Nazirliyinin İctimai Səhiyyə və İslahatlar Mərkəzi, Monitorinq və təhlil şöbəsinin həkim-metodisti Afət Məmmədova "Erkən nikah və onun reproduktiv sağlamlığa təsiri" mövzusunda nazirliyin canlı yayımında qonaq olarkən deyib.

O bildirib ki, həmçinin təhlillərə görə, 18 yaşına qədər qızlarda ana ölümü hallarına əsasən erkən doğuş səbəb olur.

"15 yaşından kiçik yaşda hamilə olanlarda bir sıra fəsadlar özünü göstərə, vaxtından əvvəl doğuşlar meydana gələ bilər. Ümumdünya Səhiyyə Təşkilatının məlumatına görə, qadın üçün dünyaya uşaq gətirmək yaşı 18-35 yaş arasındadır. Digər tövsiyəyə görə, doğuşdan növbəti hamiləliyə qədər 2 il fasilə vermək lazımdır. Qadın, bədənində olan bütün qiymətli maddələri uşağa ötürür. Bu səbəbdən də doğuşdan sonra ananın potensialı zəifləyir. Bu səbəbdən də 2 il fasilə vermək və uşağı bu müddətdə ana südü ilə qidalandırmaq lazımdır" - deyə o qeyd edib.