Naxçıvan Mərkəzi Xəstəxanasında Akademik Zərifə Əliyeva adına Milli Oftalmologiya Mərkəzi ilə Azərbaycan Oftalmoloqlar Cəmiyyətinin birgə təşəbbüsü ilə Azərbaycan Oftalmoloqlar Cəmiyyətinin X Regional Konfransı keçirilib.

 

Aztibb.az Milli Oftalmologiya Mərkəzinə istinadla xəbər verir ki, konfransda Azərbaycandan və Naxçıvandan mütəxəssis və alimlər iştirak edib.

 

Konfransı giriş sözü ilə Azərbaycan Oftalmoloqlar Cəmiyyətinin sədri, Akademik Zərifə Əliyeva adına Milli Oftalmologiya Mərkəzinin direktoru, prof. Elmar Qasımov açıq elan etdi. Daha sonra Naxçıvan Muxtar Respublikasının Səhiyyə naziri Niyazi Novruzov, Naxçıvan Dövlət Universitetinin rektoru Elbrus İsayev, dr. Ceyhun Nəzərli çıxış ediblər.

 

Konfransda professor Kərəm Kərimov, t.ü.f.d. Xəlil Hüseynov, t.e.d. Hicran Namazova, t.e.d. Rəna Ağayeva, t.ü.f.d. Misirxan Ağayev və digər ölkə alimləri iştirak ediblər.

 

Konfrans t.ü.f.d. İsmayılov Q.M., t.ü.f.d.Axundova L.Ə., t.ü.f.d. Haciyeva N.R., Dr. Əlihüseynli E.H., Dr. Əliyeva K.Ə, Dr. Həsənov C.V. moderatorluğu ilə həyata keçirilib.

 

Konfransda “Azərbaycanın rayonlarında səyyar oftalmoloji yardımın təşkili”, “Orbitanın yad cisimlərinə dair”, “Ordunun döyüş hazırlığının yüksəldilməsi istiqamətində hərbi və mülki oftalmoloqların qarşılıqlı fəaliyyəti”, “Gecikmiş mərhələdə torlu qişanın qopmaları” , “Diqqət! Endoftalmit!”, “Cərrahi əməliyyatlarla bağlı rast gəlinən fəsadlar. Həkim səhvinin rolu nə qədərdir?”, “Oftalmoloji yardımın III etapında torlu qişanın reqmatogen qopması diaqnozu ilə xəstələrin demoqrafik və klinik səciyyələri”, “Naxçıvan Muxtar Respublikasında qlaukoma xəstəliyinin yayılması” kimi məsələlər müzakirə edilib.

 

Konfransın keçirilməsində məqsəd oftalmologiyada baş verən yenilikləri, aktual məsələri müzakirə edərək Azərbaycan oftalmologiyasının həmçinin region həkimlərinin inkişafına dəstək olmaqdan ibarətdir.