İntihar edəcəyini istər zarafatla, istərsə də ciddi olaraq dilə gətirən insanlara qarşı diqqətli olmaq lazımdır. Unutmamaq lazımdır ki, intihar etmək fikrini dilə gətirən hər 5 insandan biri intihara cəhd edir və intihara cəhd edən hər 10 insandan biri ölür.

Aztibb.az xəbər verir ki, bunu Binəqədi Tibb Mərkəzinin psixoloqu İfrat Hüseynova bildirib.

Onun sözlərinə görə, bu rəqəmlər intihardan danışıran birinin guya diqqəti cəlb etmək istədiyini və həqiqətdə belə bir təhlükə yoxdur fikrinin nə qədər səhv olduğunu, bunun zarafatının belə ölümlə nəticələnə biləcəyini göstərir.

İfrat Hüseynova qeyd edib ki, tanıdığınız biri intihara cəhd edərsə onu dinləyin, çox şiddətli olan ağrı və kədərini azaltmağa çalışın. İnsanın ağrı və boşluqdan başqa seçimlərinin olduğunu görməsinə kömək edərək, ölməkdən başqa seçimi olmadığına inandığı perspektivini genişləndirin.

"İntihar haqqında açıq və sakit danışın. İntiharın qeyri-adekvat bir həll yolu olduğuna dair fikrinizi qoruyun.

Bir mütəxəssisə (psixiatra və ya psixoterapevtə) müraciət edin və heç vaxt təkbaşına bu məsələyə görə məsuliyyət daşımayın.

Unutmayın, intihara meyilli insanın dediklərini sirr saxlamaq, onu qorumağa çalışmaq çox risklidir", - deyə psixoloq bildirib.