Azərbaycan Tibb Universitetinin (ATU) Tədris Terapevtik Klinikasının müalicə işləri üzrə direktor müavini Fəridə Hacıyeva, klinikanın həkimləri və rezidentlərinin iştirakı ilə "Çoxsaylı Mielom" mövzusunda seminar keçirilib.
Klinikadan Aztibb.az-a bildirilib ki, tədbirdə Hematologiya şöbəsinin rezidenti Təranə Axundova mövzu üzrə təqdimatla çıxış edib.
Çoxsaylı mielomun bizim immun sistemimizin hüceyrələri olan plazma hüceyrələrinin bədxassəli xəstəliyi olduğunu deyən həkim bu xəstəliyin 65-74 yaş arası insanlarda daha çox rast gəlindiyini bildirib.
T.Axundova qeyd edib ki, risk faktorları qrupuna əsasən kişi cinsi, yüksək yaş qrupu, Afrika kökəni, peşə zəhərlənmələri və radiyasiyaya məruz qalmaq daxildir.
Həmçinin xəstəlikdə bir çox genetik mutasiyalar, onkogen aktivasiyalar etioloji faktor sayılır.
Xəstəliyin əsas simptomları haqqında da ətraflı məlumat verən məruzəçi bu qrupa sümüklərdə ağrı və zədələnmələr, qan parametrlərinin miqdarının artması, sinir zədələnmələri, qanda Ca səviyyəsinin yüksəlməsi, böyrək mənşəli problemlər, infeksiyalar daxil olduğunu bildirib
Sonda T.Axundova tərəfindən iştirakçıların sualları cavablandırılıb, mövzu ətrafında geniş müzakirələr aparılıb.