Sumqayıt Şəhər İcra Hakimiyyəti Başçısı yanında Narkomanlığa və Narkotik Vasitələrin Qanunsuz Dövriyyəsinə Qarşı Mübarizə üzrə Komissiyanın təşəbbüsü ilə Sumqayıt Şəhər Polis İdarəsi və Sumqayıt Tibb Mərkəzinin (STM) birgə təşkilatçılığı ilə Sumqayıt şəhər 43 nömrəli tam orta məktəbdə “Narkotiklərə yox de!“ adlı maarifləndirici xarakterli görüş keçirilib.

STM-dən Aztibb.az-a bildirilib ki, Sumqayıt Şəhər Polis İdarəsinin Yetkinlik Yaşına Çatmayanların Profilaktik İşinin Təşkili bölməsinin rəisi, polis mayoru Azər Bağırov, məktəbin direktoru Humay Ramazanova, Sumqayit Tibb Mərkəzinin Keyfiyyətə Nəzarət Komitəsinin rəhbəri Dr. Dünya Hüseynova, Narkoloji Dispanserin həkimi Vüsal Cabbarov, 2 nömrəli Ailə Sağlamlıq Mərkəzinin (ASM) həkim-pediatrı Müsənbər Səfərova narkotiklərdən zərər çəkmiş yetkinlik yaşına çatmayanların fərdi reabilitasiyasının və cəmiyyətdə inteqrasiyasının həyata keçirilməsinə bağlı geniş təqdimatla çıxış ediblər.

Çıxışda narkomaniyaya qarşı mübarizənin əsas məqsədi sağlam mühit və sağlam gələcək olduğu vurğulanıb.

Narkotiklərin insan orqanizminə məhvedici təsiri, törətdiyi sosial bəlalar, həmçinin narkomanlığın cəmiyyətə və insanların sağlamlığına ziyanı barədə ətraflı məlumat verilib.

Sonda iştirakçıları maraqlandıran suallar cavablandırıb.