Sumqayıt Tibb Mərkəzinin (STM) tabeliyində olan Təcili Tibb Yardım Xəstəxanasında “Məişət zorakılığı” mövzusunda tədbir keçirilib.

STM-dən Aztibb.az-a bildirilib ki, tədbirdə Mərkəzin tabeliyində olan tibb müəssisələrinin tibb bacıları iştirak ediblər.

Tədbirdə “Qadın Təşəbbüsü və Sosial Problemlərin Həllinə Yardım” İctimai Birliyinin sədri Zenfira Mustafayeva və Sumqayıt Qadın Resurs Mərkəzinin koordinatoru Günel Ələkbərova mövzu ilə bağlı geniş təqdimatla çıxış ediblər.

Bildirilib ki, dünyanın bütün ölkələrində olduğu kimi, cəmiyyətimizdə də məişət zorakılığı hallarının mövcudluğu hüquqi müstəvidə bu hallarla mübarizəni gündəmə gətirir. Məişət zorakılığı və ya ailədə zorakılıq halları tək bir ailə üçün yox, bütövlükdə cəmiyyət üçün təhlükəlidir. 

Vurğulanıb ki, məişət zorakılığı probleminin həlli obyektiv yanaşma, analitik tədbirlərin həyata keçirilməsini tələb edir.

Natiqlər məişət zorakılığının qarşısının alınması istiqamətində görülən işlərin səmərəliliyini artırmaq üçün qabaqlayıcı tədbirlərin gücləndirilməsi, zorakılıqdan zərər çəkmiş şəxslərə təxirəsalınmaz və hərtərəfli yardım göstərilməsinin vacibliyindən danışıblar.

Qeyd edilib ki, bir çox hallarda məişət zorakılığı qurbanı olan şəxslər onlara qarşı törədilənlər barədə susur və bunlara dözməkdə davam edir: “Onlar qorxudan yaxud utandıqlarından bu barədə heç kimə heç nə söyləmirlər, eyni zamanda yeni zorakılıq burulğanına düşməkdən ehtiyat edirlər. Lakin unudurlar ki, bununla da həmin şəxslər özlərinin və yaxınlarının həyatını daha da təhlükəyə atırlar. Çünki tədqiqatlar göstərir ki, zorakılıq törədən şəxslərin əməlləri cəzasız qalanda onlar yenidən həmin hərəkətləri törədərək ətrafındakı insanların həyatını kabusa çevirirlər”.

Məlumat verilib ki, cəmiyyətimizdə zorakılıq hallarının qarşısının alınması və azaldılması sahəsində təmənnasız olaraq yardım əlini uzadan dövlət orqanları, qeyri-hökumət təşkilatları və digər qurumlar vardır.

Bildirilib ki, kiməsə qarşı cinayət törədilərsə, ilk növbədə ən yaxın olan polis bölməsinə müraciət edilməli, yaxud Azərbaycan Respublikası Daxili İşlər Nazirliyinin 102 saylı qaynar xəttinə zəng edilməlidir.

STM-nin şöbə müdiri Aynur Həsənova isə məişət zorakılığı hallarının qarşısının alınması üçün maarifləndirmə işinin gücləndirilməsinin vacib əhəmiyyət daşıdığını tədbir iştirakçılarının diqqətinə çatdırıb.

Sonda iştirakçıları maraqlandıran suallar cavablandırılıb.