Təcili yardım sistemləri səhiyyənin vacib hissəsidir və bütün dünyada bir çox insan üçün səhiyyə ilə ilk əlaqə nöqtəsi rolunu oynayır.
Aztibb.az-ın xəbərinə görə, ÜST-nin Ölkə Ofisi USAID/Azerbaijanın maliyyələşdirdiyi “Azərbayəcanda pandemiyaya cavab tədbirləri” layihəsi çərçivəsində təcili yardım sistemləri və xidmətləri, təlimlər və standartlarının təkmilləşdirilməsini dəstəkləməyi hədəfləyir.
Bu məqsədlə 12 dekabrda başlayan təlimlərlə “Təcili yardım sisteminin təkmilləşdirilməsi həftəsi”nə start verilib.
3 gün davam edən və 80 nəfərin qatılacağı təlimlərdə Yeni Klinika, Kliniki Tibbi Mərkəz və Sumqayıt Təlim, Simulyasiya və Qiymətləndirmə Mərkəzində “Təməl həyat dəstəyi”, “Təməl təcili ultrasəs” və “Endotraxeal intubasiya və sürətli ardıcıl intubasiya” mövzularında təcili yardım və digər səhiyyə işçiləri, eləcə də qeyri-tibb ixtisaslı şəxslərə/müəllimlərə təlim keçiləcək.
Həftə 16 dekabrda Azərbaycan Tibb Universitetində baş tutacaq simpozium və 17 dekabrda keçiriləcək “Təcili tibbi yardım yol xəritəsi”nin müzakirə olunacağı işçi qrupu toplantıları ilə davam edəcək.
Qeyd edək ki, “Azərbaycanda pandemiyaya cavab tədbirləri” layihəsi Azərbaycan Respublikası Səhiyyə Nazirliyi, İcbari Tibbi Sığorta üzrə Dövlət Agentliyi, TƏBİBTƏBİB və tibb təhsili müəssisələri ilə əməkdaşlıqla həyata keçirilir