Səhiyyə Nazirliyi İctimai Səhiyyə və İslahatlar Mərkəzində (İSİM) Azərbaycan Tibb Universitetinin (ATU) Səhiyyə menecmenti fakültəsinin magistr pilləsində təhsil alan tələbələri ilə görüş keçirilib. Görüşün məqsədi tələbələri ölkəmizdə ictimai səhiyyə və əhalinin tibbi maarifləndirilməsi istiqamətində görülən işlərlə bağlı məlumatlandırmaq olub.

 

İSİM-dən Aztibb.az-a bildirilib ki, görüşdə Mərkəzin direktoru Qəhrəman Haqverdiyev tələbələrə rəhbərlik etdiyi müəssisənin fəaliyyəti barədə məlumat verib. Bildirib ki, ölkəmizdə səhiyyə sisteminin inkişafına öz töhfəsini verən İSİM-in əsas vəzifəsi əhalinin sağlamlığının yaxşılaşdırılmasına, əhalinin orta ömür müddətinin artımına, sağlam həyat tərzinin təmin edilməsinə nail olmaqdır. Onun sözlərinə görə bu istiqamətdə səhiyyə işçiləri, ictimai səhiyyə mütəxəssisləri tərəfindən əhali arasında daim təşviqat aparılır.

 

Sonra Mərkəzin Səhiyyə siyasəti və planlaşdırma şöbəsinin müdiri Nabil Seyidov təqdimatla çıxış edərək İSİM tərəfindən həyata keçirilən müxtəlif maarifləndirmə tədbirləri, sorğu və tədqiqatlar barədə danışıb. Bildirib ki, İSİM Ümumdünya Səhiyyə Təşkilatı, BMT və digər beynəlxalq təşkilatların metodologiyaları, beynəlxalq koordinasiyası və dəstəyi ilə uşaqlarda piylənmə (COSI), məktəbyaşlı uşaqların davranışları (HBSC) və risk faktorları üzrə (STEPS) araşdırmalar və digər tədqiqatlar aparan Avropa ölkələri sırasındadır.

 

İSİM-in Səhiyyə kommunikasiyası şöbəsinin müdiri Laura Quliyeva çıxış edərək vurğulayıb ki, ölkəmizdə səhiyyə işçiləri və ictimai səhiyyə mütəxəssisləri tərəfindən sağlam həyat tərzi ənənəvi və müasir innovativ üsullarla təbliğ olunur, tütünçəkmə və digər zərərli vərdişlərdən imtina etməyin vacibliyi bir daha izah edilir. Məruzəçi qeyd edib ki, tütündən imtina etmək istəyənlərə dəstək olmaq və onlara yardım etmək məqsədilə 1 fevral 2021-ci il tarixdən İSİM tərəfindən əhali üçün tütündən imtina üzrə Qaynar xətt fəaliyyətə başlayıb və tütünçəkmədən imtina etmək istəyən şəxslərin zəng edərək, peşəkar tibbi-psixoloji məsləhətlər almaları təmin olunub. L.Quliyeva, həmçinin, tələbələri əhalinin tibbi maarifləndirilməsi istiqamətində gələcəkdə keçiriləcək tədbir və aksiyalarda yaxından iştirak etməyə çağırıb.

 

Daha sonra tələbələr İSİM-də fəaliyyət göstərən və həkimlər üçün təlimlərin həyata keçirilidiyi Simulyasiya Mərkəzi ilə tanış olublar.

 

Sonda onları maraqlandıran suallar cavablandırılıb, iştirakçılara İSİM tərəfindən nəşr edilən maarifləndirici materiallar paylanılıb.