Binəqədi Tibb Mərkəzində ümummilli lider Heydər Əliyevin anım günü münasibətilə tədbir keçirilib.

Əvvəlcə Ulu Öndərin əziz xatirəsi bir dəqiqəlik sükutla yad edilib.

Tədbirdə Binəqədi Tibb Mərkəzinin direktoru Əsədulla Sultanov dahi lider Heydər Əliyevin müasir Azərbaycanın qurucusu və memarı olduğunu vurğulayıb. Direktor müdrik liderin vəfatından 19 il keçdiyini, onun layiqli davamçısı Prezident İlham Əliyevin onun siyasi kursunu uğurla davam etdirdiyini və bunun nəticəsi olaraq müasir və inkişaf etmiş Azərbaycanda yaşadığımızı bildirib. Ümummilli Liderin hakimiyyətə gəlişinin ölkədə əmin-amanlıq, sakitlik yaratdığını, Azərbaycan dövləti tarixində quruculuq mərhələsinin başladığını vurğulayıb.

Binəqədi Tibb Mərkəzinin baş həkimi Rafiq Nağıyev Ulu Öndərin Azərbaycanı daima müstəqil və bütöv görmək arzusunda olduğunu xatırladaraq, onun layiqli davamçısı İlham Əliyev tərəfindən vətənimizin ərazi bütövlüyünün təmin edildiyini, Ümummilli Liderin ruhunun şad olduğunu bildirib.

Daha sonra Binəqədi Tibb Mərkəzinin Reanimasiya və intensiv terapiya şöbəsinin müdiri Nərminə Məmmədli Ümummilli Liderin səhiyyə sahəsində apardığı uğurlu islahatların səhiyyəmizin inkişafına verdiyi töhfələrdən danışıb.

Binəqədi Tibb Mərkəzinin həkim-diyetoloqu Nigar Cəfərova və həkim-kardioloqu Lamiyə Hüseynova Ulu Öndərin ideyalarının Azərbaycanın ictimai-siyasi həyatının bütün sferalarında uğurla icra olunduğunu və müasir Azərbaycan gəncliyinin daima Ulu Öndərin ideyalarına sadiq qalacağını qeyd ediblər.