Sumqayıt Tibb Mərkəzinin (STM) tabeliyində olan 3 nömrəli Ailə Sağlamlıq Mərkəzində "Sumqayıt Narkomaniyaya yox deyir" mövzusunda tədbir keçirilib.

STM-dən Aztibb.az-a bildirilib ki, tədbirin keçirilməsində məqsəd narkotiklərdən zərər çəkmiş yetkinlik yaşına çatmayanların fərdi reabilitasiyasının və cəmiyyətə inteqrasiyasının həyata keçirilməsidir.

Pediatrların iştirak etdiyi tədbiri 3 nömrəli ASM-in baş həkimi Maisə İsmayılova giriş sözü ilə açaraq bildirib ki, narkomaniya insan cəmiyyətinin mənəvi və əxlaqi dəyərlərinə ciddi zərbə vuran, həyat və sağlamlığına böyük təhlükə yaradan bəlalardan biridir.

M.İsmayılova yetkinlik yaşına çatmayanlarla həkimlərin sıx işləməli olduğunu qeyd edib və mənfi halların qarşısının almağında tibb işçilərinin böyük rolunun olduğunu vurğulayıb.

Sonra 3 nömrəli ASM-in ailə həkimi Nazilə Məmmədova sözügedən mövzuda geniş təqdimatla çıxış edib. O, bu dəhşətli bəlanın insan sağlamlığına vurduğu zərərlərdən, törətdiyi fəsadlardan bəhs edib.

Məruzəçi yeniyetmə və gənclərin asudə vaxtlarının səmərəli və düzgün təşkil edilməsi, sağlam həyat tərzinin təbliğindən danışıb.

STM-in direktor müavini - İlkin səhiyyət xidmətinin rəhbəri İlkin Namazov isə bu kimi tədbirlərin mühüm əhəmiyyət kəsb etdiyini vurğulayıb.

İ.Namazov bildirib ki, narkotik maddələrin qəbul edilməsi ilə insan fiziki və psixoloji cəhətdən məhv olur.

Qarşılıqlı fikir mübadiləsi şəraitində keçən tədbirdə iştirakçıları maraqlandırn suallar cavablandırılıb.