Həkimlərimizi tanıyaq! - Gömrük Hospitalının Tibbi laboratoriya şöbəsinin müdiri SEVİNC GÜLMALIYEVA - aztibb.az AZƏRBAYCANIN SƏHİYYƏ XƏBƏR PORTALI

Həkimlərimizi tanıyaq! - Gömrük Hospitalının Tibbi laboratoriya şöbəsinin müdiri SEVİNC GÜLMALIYEVA

10.12.2022 11:40

“Həkimlərimizi tanıyaq!” rubrikamızda Sizə Mərkəzi Gömrük Hospitalının Tibbi laboratoriya şöbəsinin müdiri Sevinc Gülmalıyevanı təqdim edirik.

Sevinc Gülmalıyeva 1988-1993-cü illərdə Bakı Dövlət Universitetinin Biologiya fakültəsində təhsil alıb. 1994-cü ildə Azərbaycan Respublikası Səhiyyə Nazirliyi Əziz Əliyev adına Azərbaycan Dövlət Həkimləri Təkmilləşdirmə İnstitutunda həkim-laborant ixtisası üzrə kurs bitirib. O, təhsilini 2008-2009-cu illərdə Moskva Ali Kommersiya məktəbinin Biznes idarəetmə fakültəsində davam etdirib. Sevinc həkim 1993-2009-cu illərdə müxtəlif dövlət və özəl tibbi müəssisələrində əvvəlcə həkim-laborant, 2000-ci ildən etibarən laboratoriya müdiri vəzifəsində çalışıb, 2009-cu ildən isə Mərkəzi Gömrük Hospitalının Tibbi laboratoriyasının rəisi kimi fəaliyyət göstərir.

O, Mərkəzi Gömrük Hospitalının Tibbi Laboratoriyasında bioloji mayelərdə ümumi kliniki, biokimyəvi, immunoloji, seroloji, allerqoloji, koaquloloji, farmakoloji, bakterioloji laborator müayinələrin aparılması və interpretasiyası ilə məşğul olur.

Daim öz bilik və bacarıqlarını inkişaf etdirən Sevinc Gülmalıyeva davamlı olaraq ölkə daxilində və xaricində keçirilən müxtəlif elmi tədbirlərdə iştirak edir. Belə ki, Sevinc həkim 1998-ci ildə Türkiyənin Diasis Diaqnostik Sistemlər, 2000-ci ildə Türkiyənin BioDPC təşkilatlarının təşkilatçılığı ilə keçirilən “Diaqnostik avadanlıqlar” mövzusunda kursda, 2006-cı ildə Azərbaycan Respublikası Səhiyyə Nazirliyi Əziz Əliyev adına Azərbaycan Dövlət Həkimləri Təkmilləşdirmə İnstitutunda keçirilən “Laboratoriya müdirləri üçün müasir müayinələrinin interpretasiyası” təlimində iştirak edib.

Peşəkar həkim 2005-ci ildə İngiltərənin CPA və UKAS akkreditasiyalı JMJ laboratoriyasının təşkil etdiyi təlim kursu, 2006-cı ildə Moody İnternational Sertifikatlaşdırma Keyfiyyət Təminatlı - Daxili Auditor treninq kursu, 2007-ci ildə Roche Diaqnostik avadanlıqların treninq kursu, 2009-cu ildə Teknolab təşkilatının təşkilatçılığı ilə - Diaqnostik avadanlıqların təlim kursu, 2009-cu ildə Fransada Biomerieux təşkilatının təşkilatçılığı ilə - Diaqnostik avadanlıqların treninq kursu, 2011-ci ildə Türkiyədə Nesil grupu ilə - Diaqnostik avadanlıqların təlim kursunu keçib.

Sevinc həkim 2019-cu ildə İSO 15189:2012 Tibbi laboratoriyalar- Keyfiyyətə və Səlahiyyətliliyə olan tələblər təlimində, 2022 -ci ildə Türkiyə Klinik Biokimyaçılar Assosiasiyasının təşkilatçılığı keçirilən İrsi Metabolik Xəstəliklərin Laboratoriyası mövzusunda 4-cü Milli simpoziumunda iştirak edib. O, 2016-cı ildə Dövlət Gömrük Komitəsi tərəfindən təşəkkürnümə, 2020-ci ildə isə Fəxri fərmanla təltif olunub.