Çukurova Universiteti (ÇÜ) Tibb fakültəsi Balcalı Xəstəxanasının sinə xəstəlikləri sahəsi üzrə dosenti Yasemin Saygıdeyer tədqiqatlar zamanı koronavirusun xərçəng hüceyrələrinin yayılmasını sürətləndirdiyini müəyyən etdiklərini bildirib.

Aztibb.az medimagazin.com.tr-yə istinadla xəbər verir ki, türkiyəli alimlər Biotexnologiya Araşdırma və Tətbiq Mərkəzində klinikada müalicə alan 25 könüllüdən nümunələrlə koronavirusun xərçəng hüceyrələrinə təsirini araşdırıblar.

Döş, qaraciyər, yoğun bağırsaq və ağciyər xərçəngi ilə bağlı araşdırma çərçivəsində COVID-19 xəstələrinin qanından alınan nümunələr laboratoriyalarda çoxaldılan müxtəlif xərçəng hüceyrələrinə yeridilib. 1 il davam edən araşdırmanın nəticələrinə əsasən məlum olub ki, qan nümunəsi vurulan xərçəng hüceyrələri “metastaz” deyilən bir proses keçir, yəni, digər orqan və ya toxumalara yayılma potensialını artırır.

Alınan nəticələr SpringerLink, MDPI və Frontiers beynəlxalq elmi nəşriyyatları tərəfindən dərc olunan məqalələrdə yer alıb. 

Məqalələrə beynəlxalq nəşrlərdə çoxlu sayda istinad olduğunu deyən dos. Yasemin Saygıdeyer koronavirusun təsiri ilə ağciyərlərdə parçalanmış hüceyrələrdə sitokinlər və digər viruslarla əlaqəli hissəciklərin qana qarışaraq bütün bədənə yayıla biləcəyini bildirib: "Əgər bir insanda xərçəng varsa, bu hissəciklər hüceyrələrə çatır. Hazırda bu vəziyyətin xərçəng hüceyrələrinə necə təsir etdiyini araşdırdıq".

"Tədqiqat zamanı bəzi xərçəng xəstələrində koronavirus keçirdikdən 6 ay sonra ağciyər metastazlarının artdığının şahidi olduq. Hətta yumurtalıq xərçəngi olan xəstələrin koronavirusdan sonra 3-cü və 6-cı aylardakı tomoqrafiya görüntülərində birdən-birə ağciyərlərində xeyli irəliləyişlər olduğunu gördük", - deyə Yasemin Saygıdeyer əlavə edib.