Belə layihələrdən biri tibb işçiləri arasında COVID-19 vaksinin effektivliyinin ölçülməsidir. Bu tədqiqatı dəstəkləmək üçün Ümumdünya Səhiyyə Təşkilatı tibb işçiləri arasında COVID-19 infeksiyası üçün risk faktorlarının müəyyən edilməsinə dair məlumat verəcək sorğunun keçirilməsi və epidemioloji və seroloji məlumatların alınması səylərində Azərbaycana dəstək göstərməyi öhdəsinə götürür.

 

2021-ci ilin yanvar ayından Azərbaycan prioritet qruplardan biri kimi səhiyyə işçilərinin peyvəndlənməsinə başlayıb. Ümumdünya Səhiyyə Təşkilatı (ÜST) laboratoriya tərəfindən təsdiqlənmiş SARS-CoV-2 infeksiyası və COVID-19 xəstəliyinin qarşısının alınmasında COVID-19 peyvəndinin effektivliyini qiymətləndirmək üçün protokol hazırlayıb.

 

Bu layihə missiyası çərçivəsində ÜST və Xəstəliklərə Nəzarət və Profilaktika Mərkəzinin ekspertləri 28 noyabr – 2 dekabr 2022-ci il tarixlərində Azərbaycan Respublikasında səfərdə olublar. Səfər zamanı ÜST-nin ölkə ofisi nümayəndələri ilə missiya üzvləri Səhiyyə Nazirinin müavini Nadir Zeynalov ilə görüşüblər. ÜST ekspertləri Vaksin Effektivliyi (VE) tədqiqatının milli işçi qrupu ilə görüşüb, səhiyyə müəssisələrinə, laboratoriyalara və İctimai Səhiyyə və İslahatlar Mərkəzinə baş çəkiblər.

 

Missiyanın sonunda layihənin icmalı, əsas məqamlar, tədqiqatın nəticələrinə dair elmi məqalələr və digər məsələləri müzakirə etmək üçün milli səhiyyə orqanlarının - Səhiyyə Nazirliyi, İcbari Tibbi Sığorta üzrə Dövlət Agentliyi və TƏBİB-in nümayəndələri ilə VE-nin öyrənilməsinə həsr olunmuş dəyirmi masa təşkil edilib.