“Həkimlərimizi tanıyaq!” rubrikamızda şəfalı əlləri ilə minlərlə insanı sağlamlığına qovuşduran, onlara sağlam ürək bəxş edən Mərkəzi Gömrük Hospitalının Ürək-damar cərrahiyyəsi şöbəsinin müdiri, uzman ürək-damar cərrahı Elməddin Əliyevi təqdim edirik.

Elməddin Əliyev 2007-ci ildə Azərbaycan Tibb Universitetinin Müalicə işi fakültəsini bitirib. 2007-2013-cü illərdə Türkiyənin Ege Universitetinin Ürək-damar cərrahiyyəsi fakültəsində təhsilini davam etdirib. O, eyni zamanda, 2011-ci ildə ABŞ-ın Texas A&M Universitetində süni ürək proqramında çalışıb, 2012-ci ildə SCOTT & WHITE Hospitalında kardiotorakal cərrahiyyə kursu keçib.

Uzman həkim əmək fəaliyyətinə 2013-cü ildə Türkiyədə Ege Universitetinin Ürək-damar cərrahiyyəsi kafedrasında ürək cərrahı kimi başlayıb. 2014-cü ildən Mərkəzi Gömrük Hospitalında Ürək-damar cərrahiyyəsi şöbəsinin müdiri vəzifəsində çalışır.

O, Mərkəzi Gömrük Hospitalının Ürək-damar cərrahiyyəsi şöbəsində aort cərrahiyyəsini, qazanılmış ürək xəstəliklərinin cərrahiyyəsini, Aorto koronar şuntlama əməliyyatını, intaortik balon pompasının tətbiqini və ürək-damar xəstəliklərinin cərrahiyyəsini uğurla həyata keçirir.

Elməddin Əliyev daim öz üzərində çalışan, dünya tibbinin nailiyyətlərini izləyən və təcrübəsində bu nailiyyətlərdən yararlanan həkimdir. O, 2012-ci ildə Türkiyədə keçirilən Ürək və Damar cərrahiyyəsi dərnəyinin XII beynəlxalq konqresində, 2013-cü ildə Türkiyədə Ürək və Damar cərrahiyyəsi dərnəyinin ekstrakorporal qan dövranı dəstəyi kursunda ixtisasını artırıb. Cərrah həkim müxtəlif illərdə Azərbaycanda və ölkə xaricində keçirilən öz sahəsi üzrə beynəlxalq elmi tədbirlərdə iştirak edir. O, Azərbaycan Kardiologiya Cəmiyyətinin və Türk Ürək-Damar Cəmiyyətinin üzvüdür.

Uzman həkimin qəbuluna yazılmaq üçün əlaqə nömrəsi: (012) 404-08-08.