Portuqaliyanın paytaxtı Lissabon şəhərində Beynəlxalq Diabet Federasiyasının (BDF) 5-8 dekabr 2022-ci il tarixlərində keçirilən “Diabetin gələcəyini formalaşdırmaq” adlı konqresdə BDF-nin üzvü olan Azərbaycan Diabet Liqasının nümayəndələri iştirak edir.

TƏBİB-dən Aztibb.az-a bildirilib ki, iştirak edən şəxslər arasında Respublika Endokrinoloji Mərkəzin direktoru Nərmin İsmayılova, Mərkəzin əməkdaşları - Azərbaycan Diabet Liqasının sədri Yeganə Sultanova, sədr müavini Səriyyə Ağayeva və başqaları olub.

Konqres çərçivəsində ən son elmi tədqiqatlar, səhiyyədə diabetoloji xidmətlərin təşkili, qlobal səhiyyə sistemində diabet mövzusunun yenilikləri müzakirə edilib.

Eyni zamanda, dünyanın müxtəlif ölkələrindən gəlmiş mütəxəssislərlə görüşlər baş tutub, təcrübə mübadiləsi aparılıb.

Qeyd edək ki, Beynəlxalq Diabet Federasiyası 180 ölkədən 240 təşkilatı özündə birləşdirən, qlobal səhiyyə problemləri içində diabet mövzusunda çıxış edən, ÜST və BMT ilə sıx əməkdaşlıqda olan dünya səviyyəli təşkilatdır.